Дагъустан Республикадин Кьил Сергей Меликова 2-апрелдиз йикъан кар алай месэлайриз талукь совещание тухвана. Абурук акатзавай: гьукумдин­ органар агьалийрин арзайриз килигун; мяденрикай хкудзавай къиметлу шейэриз талукь кIвалах хъсанарун; Белгороддин областдай атанвай аялар кьабулунин, абуруз яшайишдин шартIар арадал гъунин кIвалах тешкилун; газдин сертификация тавунвай тадаракар ишлемишзавай ва кIвалер, цехар чпи чпиз газдин линийрик кутазвай дуьшуьшар чирзавай рейдрин нетижаяр кьун.

Дагъустандиз Белгороддин областдай 500-ев агакьна аялар атанва. Абуру ина ялни яда, кIелунарни давамарда. Аялар кьабулнавай шартIарикай РД-дин вице-премьер Муслим Телякавова суьгьбетна. Областдай атанвай аялриз Махачкъаладин вокзалдик рикIел аламукьдай хьтин шад къаршиламишун тешкилна, ахпа абур махсус улакьра аваз чкайрал агакьарна.

Аялризни абурухъ галайбуруз «Солнечный берег» лагерда ва Махачкъаладинни Дербентдин школайра-интернатра къулай шартIар тешкилнава. Вири аялриз духтурар килигна ва гьар садан тIварцIихъ социальный паспорт гьазурнава. 1-апрелдилай аялри школайра кIе­лунин кIвалахни тешкилнава. Республикадин зегьметдин ва яшайишдин рекьяй вилик финин министерстводин векилар мугьманар авай вири чкайриз фена, анра гьаларихъ галаз таниш хьана.

Мугьманрин игьтияжар фикирда кьуна, республикадин бюджетдик герек кьадар такьатар кухтада. Алай вахтунда абур лазим тир вири шейэралди таъмин я. Мергьяматлувилин фондари чпин хивез къачунвай алава харжар арадал атанвайдини рикIел хуьзва. Сергей Меликова  Белгороддин аялар культурадин, спортдин мярекатриз активвилелди желб авунин тапшуругъ гана.

Сергей Меликован тапшуругъдалди­ кьиле тухвай рейдери дуьздал акъудайвал, Дагъустанда газ ишлемишунин къайда чIурнавай 5,5 агъзур дуьшуьш винел акъуд­на. Алай йисан кьве вацра, алатай йисан нетижайрив гекъигайла, ахтармишунар гзаф кьиле тухвана. Абур алай йисан январдиз Махачкъалада арадал атай газ хъиткьинай дуьшуьшдилай гуьгъуьниз тешкилнай. А чIавуз тамам са хизан телеф хьанай. Иесиди кIвал вичи-вичиз газдин линиядик кутунвай.

23-январдилай 2-апрелдалди пешекарри 31 агъзур абонент ахтармишна. Малум хьайивал, 1,5 агъзур абонентди чпин кIвалер, карханаяр, майишатар законсузвилелди газдин сетрик кутунвай. 4 агъзур касди чпин дараматра сертификация тавунвай газдин тадаракар эцигнавай. Идан гьакъиндай республикадин энергетикадин ва тарифрин рекьяй министр Марат Шихалиева малумарна. Инсанриз  хата хкатзавай чIурувилерик вуч акатзавай лагьайтIа, ишлемишзавай газ акъатзавай гурмагъар, вентиляциядин каналар законди истемишзавай къайдада туькIуьр тавун, къецепатан уьлквейрин пичер (каминар) эцигун, сертификация тавунвай шлангар ишлемишун.

«Газпром межрегионгаз Махачкала» компаниядин генеральный директор Ризван Мурадова хабар гайивал, газдихъ галаз алакъалу организацийри яшайишда газ ишлемишунин хатасузвал таъминарун патал чалишмишвалзава. Ада лагьайвал, компаниядин пешекарри технический рекьяй къуллугъ авуниз­ талукь икьрарар кутIуннавай хсуси ва гзаф квартирайрикай ибарат кIвалера ишлемишзавай газдин тадаракар ахтармишзава.

— Къенин йикъалди 400 агъзур абонентдин патахъай жавабдарвал «Газпром газораспределение Дагестан» ва «Газпром  газораспределение Махачкала» идарайрин хиве ава. Икьван гагьда технический рекьяй къуллугъ авунин 350 агъзур икьрар кутIуннава. Ида 80,3 процент тешкилзава, — лагьана Р. Мурадова.

С.Меликова муьштерияр газдикай хкуд тавунал, хатасузвал таъминарунал ва закондин бинедаллаз газ ишлемишдай шартIар тешкилунал фикир желбна.

«РикIел хуьх, юлдашар, дуьздаказ гилиг тавунвай шланг хкудунихъ галаз сад хьиз, объектар газдалди таъминарунин кIвалахни законди истемишзавайвал кьиле тухун тешкила. И везифа чи вилик Россиядин Президентди эцигнава. Ахтармишунар кьиле тухудайла, газдин сет­рикай хкуднавай вири абонентриз талукь месэлаяр муниципалитетрихъ галаз санал гьялдайвал хьурай. Чаз коммерциядин итижрилай гьар са дагъустанвидин уьмуьр ва сагъламвал багьа я», — лагьана региондин Кьили.

Мярекатдал Сергей Меликова РД-дин зегьметдин ва яшайишдин рекьяй вилик финин министерстводин вилик гзаф аялар авай хизанриз куьмек гудай респуб­ликадин Фонд тешкилунин месэла эцигна.

«Гзаф аялар авай хизанриз чпин хсуси такьатрикай куьмек гуз кIанзавай гзаф ксар ава»,- лагьана региондин кьили.

Хийир  Эмиров