6-апрелдиз Дербентда Дагъустандин Кьил Сергей Меликован тIварцIихъай чIехи ифтар кьиле фида. Ана 9 мусурман уьлкведин векилрини иштиракдайвал я.
РД-дин Кьилин пресс-къуллугъди хабар гузвайвал, абурун арада Бангладеш, Малайзия, Пакистан, Къазахстан, Мавритания, Иран, Ирак, Туьркия, Узбекистан ва масабур ава.
Сивер хуьнин вацраз талукьарнавай и мярекат Н.Генжевидин тIварцIихъ галай паркуна тешкилда. Адан сергьятра аваз нашидар тамамарда, Къуръан хуралай чизвайбурун арада уьлкведин дережада аваз кьиле тухвай конкурсдин гъалибчийрив савкьатар вахкуда ва итижлу маса серенжемар тешкилда.
* * *
2025-йисуз Дагъустандин Тахо-Годидин тIварцIихъ галай Милли музей арадал гъайидалай инихъ 100 йис тамам жеда. РД-дин Кьил Сергей Меликован Указдал асаслу яз, и вакъиа республикадин дережада аваз къейддайвал я.
РД-дин медениятдин министр Зарема Бутаевади хабар гайивал, Дагъустанда музейдин 100 йисаз талукьарнавай фильм гьазурда. Идалайни гъейри, музейдин тарихдикай ктаб акъудда, махсус выставкаяр тешкилда, илимдинни тежрибадин конференцияр кьиле тухуда.
* * *
Сив хуьнин суварихъ галаз алакъалу яз, апрелдин 10, 11, 12- йикъар кIвалах тийидайбур яз малумарда. Идакай саласа юкъуз Махачкъалада кьиле фейи совещанидал Сергей Меликова хабар гана.
РД-дин Муфтиятдин пресс-къуллугъдин делилралди, Сив хуьнин сувар тахминан 10-апрелдал ацалтзава.
Агьмед Магьмудов
