2-апрелдиз РД-дин Гьукуматдин Председатель Абдулмуслим Абдулмуслимова 2024-йисуз республикада агьалияр целди таъминарунин месэладиз талукьарнавай совещание кьиле тухвана. Ана Махачкъала, Каспийск, Дербент шегьеррин, са жерге министерствойринни ведомствойрин кьилери иштиракна.
А.Абдулмуслимова къейд авурвал, республикадин вири муниципалитетар тамамдиз целди таъминарун региондин инфраструктура вилик тухунин жигьетдай кьабулнавай стратегиядин пай я. Гьавиляй и хиле кьилиз акъудзавай проектризни кьетIен фикир гузва.
Совещанидал малум хьайивал, 2027-йисалди Дагъустанда коммунальный къурулушар цIийи хъувуниз саки 34 млрд манатдив агакьна пулдин такьатар чара ийида. Абурукай 32 млрд манат федеральный бюджетдин гьисабдай я.
РД-дин премьер-министрди хабар гайивал, республикадин кьилевайбуруз, федеральный ва региондин госпрограммайрин сергьятра аваз, пулдин алава такьатар желбдай мумкинвал хьана. Кьилди къачуртIа, и такьатрихъ, федеральный дережадин «Чистая вода» проектдин сергьятра аваз, яргъивилел 32 километр алай «Чиркей-Буйнакск» водовод эцигна.
«Капитальный эцигунрикай рахайтIа, чун республикадин вилик акъвазнавай виридалайни хци месэлайрикай сад гьялуниз мукьва хьанва — Махачкъала ва Каспийск шегьеррин цин къурулушар цIийикIа туькIуьр хъувун. Идалайни гъейри, Чиркей-Махачкъала-Каспийск водоводдин проектдиз талукь мярекатарни кьиле тухуз эгечIнава», — лагьана А.Абдулмуслимова.
Чи мухбир
