Чи ватанэгьлияр — гьар сана

Гьакъисагъвал, намуслувал, кIвалах­диз вафалувал, чирвилер ва  алакьунар мадни артухариз кIан хьунин ашкъилувал — ибур гьар са пешекардиз къуллугъдин рекьяй виниз хкаж жедай мумкинвал гузвай ерияр я.  Вичин ери-бине Докъузпара райондин Къалажухрин хуьряй тир Физули Сейфедован агалкьунрикай хабар хьайила, и гьакъикъат мад сеферда зи бейнида тестикь хъхьана.

Физули Велиевич Сейфедов алай вахтунда Екатеринбургдинни Волгограддин сад авунвай «144 бронетанковый ремонтный завод» АО-дин генеральный директор я. Карханадиз куьрелди «144 лагьай БТРЗ» лугьузва.

Ам 1964-йисуз Табасаран районда дидедиз хьана. А чIавуз Физулидин буба химиядин тарсар гун патал и райондин са мектебдиз ракъурнавай. Пуд йисуз и районда муаллимвал авурдалай кьулухъ Вели вичин хизанни галаз Азербайжандин Хачмаз райондин МукьтIадир поселокдиз куьч хьана. Ина 1981-йисуз Физулиди урус мектеб куьтягьна. Гуьгъуьн­лай Волгограддиз фена ва инженер-механиквилин пешедай анин политехнический институтдик экечIна.

Кьилин образование къачур жегьилди зегьметдин рехъ Волгограддин гимияр арадал гъидай заводда устIарвилелай башламишна. Алакьунри ам са тIимил чIавалай директордин заместителвилин­ къуллугъдал хкажна. Гуьгъуьнлай ам Кургандин машиностроительный заводдин директорвиле рекье туна. Са шумуд йисуз кIвалахна, тежриба кIватIна, мад Волгограддиз хтана. Ина ада «Волгоградская машиностроительная компания ВгТЗ» (виликан Волгограддин тракторрин завод) ООО-дин директорвиле кIвалахна. СССР чкIайдалай кьулухъ и завод лап татугай гьалдиз атанвай. Чи ватанэгьлидин алахъунар себеб яз, и важиблу ва чIехи карханадивай кьвед лагьай сеферда нефес къачуз хъхьана.

ЧIехи идарадиз регьбервал гузвай Ф.Сейфедовахъ санал кIвалахзавай юлдашрин арада еке гьуьрмет ава. Ам кьве веледдин буба ва са хтулдин чIехи буба я. Бахтлу хьурай вири!

К.Ферзалиев