Кьве сеферда виниз акъатнава

2024-йисуз гатфарин тумар цунин еришар, алатай 2023-йисав гекъигайла, кьве сеферда артух хьанва. Идакай РФ-дин хуьруьн майишатдин министерстводин сайтда хабар гузва.

Чешмеди къейдзавайвал, уьлкведа­ гзафни-гзаф техилдин, технический, салан майвайрин ва емдин (кормовой) магьсулрин бегьерар гатфариз цазвай тумарай кIватI хъийизва. ИкI, алай вахтунда и кIвалахар 424, 6 агъзур гектардикай ибарат мулкунал кьиле тухванва. Им, винидихъ къейд авунвайвал, 2022-йисан рекъемдив гекъигайла, саки 2 сеферда артух я.

Идалайни алава яз, ведомстводин делилралди, 18 регионда зулун тумар цанвай майданриз миянардай затIар вегьинин кIвалахар давам жезва. Ихьтин серенжемар 5,48 миллион гектардин мулкунал кьиле тухванва (им умуми пландин 27,4 процент я). Хабар гузвайвал, и рекъемни, алатай йисав гекъигайла, 1,8 миллион гектардин артух хьанва.

РикIел хкин, виликдай чна РФ-дин хуь­руьн майишатдин министр Дмитрий Патрушеван гафарал асаслу яз, хабар гайивал, уьлкведа алай йисуз, гатфаринбурни гьисаба кьурла, тумар цанвай майданрин умуми кьадар 300 агъзур гектардин артух жеда, яни 84,5 миллион гектардив агакьда.

Къецепатан уьлквейриз

Алай йисан эвел кьилелай инихъ чIемединни пидин (масложировой) продукция экспорт авунин кьадар саки 18 процентдин артух хьанва. ИкI, и рекъем 1,75 миллион тонндив агакьнава. Идакай РФ-дин хуьруьн майишатдин министерстводин телеграм-ка­налди хабар гузва.

Чешмеди къейдзавайвал, 2023-йисан нетижайралди, и жуьредин метягьар къецепатан уьлквейриз тухунин кьадар пудан са паюнилай виниз акъатнава.

Ведомстводин делилралди, санлай къачурла, Урусатди алатай йисуз  дуьньядин базарриз 11,2 миллион тонндив агакьна чIемединни пидин хилен продукция рекье тунва.

Хабар гузвайвал, ракъинин цуькверин чIем экспорт авунин кьадар 42 процентдин артух хьанва, рапсдин чIем лагьайтIа — 64 процентдин, соядин чIем — 10 процентдин.

Хуьруьн майишатдин министерст­во­дин телеграм-каналди гьакIни къейд­завайвал, и жуьредин продукция дуьньядин гзаф уьлквейри маса къачузва­. Абурун арада Туьркия, Узбекистан, Мукь­­вал тир РагъэкъечIдай патан ва Аф­рикадин уьлквеяр ава.

Регьят жеда

Тешкилатриз ва хсуси карчийриз гила чпин карханаяр электросет­рик кутун патал арзаяр гун ва икьрар кутIунун регьят жеда. И серенжем кьиле тухуник дегишвилер кухтуниз талукь къарардал премьер-министр Михаил Мишустина къул чIугунва. Идакай уьл­кведин гьукуматдин сайтда хабар гузва.

Чешмеди къейдзавайвал, кьилди къа­чуртIа, арзачийри объектар электросетрик кутун патал къалурна кIанзавай документрин кьадар тIимиларнава. ИкI гила, арза гудайла, алишверишдал маш­гъул ксариз ЕГРЮЛ/ЕГРИП-дай къа­чунвай выпискаяр, паспортдин ко­пи­яр­ къалурунин лазимвал амукьдач, эгер абуру арза «Госуслуги» порталдай гузваз хьайитIа.

Идалайни алава яз, энергиядалди таъминаруниз талукь къарар кутIунун патал арза гудайла, тешкилат ва я та­хьайтIа хсуси карчи госрегистрация авун­вайди тестикьарзавай шагьадатнама къалурунин лазимвални амукьзавач.

Хабар гузвайвал, ихьтин къарар алишверишдал акьалтзавай пар агъу­за­рун ва административный паюниз талукь серенжемар кьезиларун патал кьабулнава.

КIвалахун патал вахканва

Уьлкведа 2018-йисалай инихъ, «Сти­мул» программадин сергьятра аваз, ЖКХ-дин саки 170 объект вахканва. Идакай, РФ-дин вице-премьер Марат Хуснуллинан гафарал асаслу яз, уьлкведин гьукуматдин сайтда хабар гузва.

Адан гафаралди, санлай къачурла­, винидихъ лагьанвай муддатда 76 регионда 169 объект — 1,6 агъзур километрдив агакьна коммунальный сетар кIвалахун патал кардик кутунва.

Чиновникди гьакIни къейд авурвал­, алай йисуз, «Стимул» программадин сергьятра аваз, ЖКХ-дин, санлай къачурла, чпин яргъивал 700 километр­дин мензилдикай ибарат тир 60 объект кIва­лахун патал вахкун пландик кутунва.

СФР-ди рикIел хкизва

Набутвал авай агьалийривай, ИПРА-­ди (индивидуальная программа­ реа­би­литации и абилитации) ва ЗВК-ди (зак­лючения­ вра­чебной комиссии) къалурнавай мес­лят­рин бинедаллаз бюджетдин гьисабдай реа­билитациядин техни­ческий такьатар къа­чуз жеда. Идакай уьлкведин яшайишдин фондунин те­лег­рам-каналди, агьалийрин рикIел хкун яз, мад сеферда хабар гузва.

Чешмеди къейдзавайвал, электрон­ный сертификатдин куьмекдалди къачузвай и такьатар (ТСР, технические средства реабилитации) лап тади ва къулай гьалда къачуз жеда, гьикI хьи, и серенжемди, рекъемрин маса гзаф сервисри хьиз, вахт хейлин кьенятзава.

РикIел хкин, 2021-йисалай эгечIна, набутвал авай агьалийриз электронный сертификатар гузва. Ихьтин сертификатдин бинедаллаз муьгьтеж тир инсандиз герек такьат къачун патал (мисал яз, коляска, ван атун гужлу ийидай аппарат ва мсб.) тайин кьадар пул чара ийизва. Гьа са вахтунда маса къачузвай такьатдин марка ва модель агьалиди вичи хкязава. Электронный сертификатди адетдин банкунин картади хьиз кIвалахзава, пул муьштериди метягь маса гузвайдаз рекье твазва (арада маса кас авачиз). Ихьтин сертификат арада мензил аваз (дистанционный къайдада) «Госуслуги» порталда ва я тахьайтIа СФР-дин ва МФЦ-дин отделенийра туькIуьриз жезва. И кардин гьакъин­дай генани тамам делилар интернетдай ва я пешекарривай чириз жеда.

Гьазурайди – Муса  Агьмедов