Президентдин сечкияр
РФ-дин Президентдин сечкияр хьана, алатна. Вири дуьньяда и вакъиадиз къиметар гузва. Разибур гзаф ятIани, наразибурни тIимил туш. Чи душманар (Европада, Америкада, масанра), гьамиша хьиз, чакай къана рахазва, президентдин сечкияр гуя чина «демократиядинбур» туш лугьузва…
Ни вуч лагьайтIани, чи Президент хкянава! Вичизни садрани тагай кьван сесер ганва! 87 процентдилай артух!.. Президент Путина дуьньядин кьуд патай тебрикар кьабулзава. Чи уьлкведа лагьайтIа, хьанвай нетижайрал са жуьредин партийрини, тешкилатрини, кьилдин ксарини шак гъизвач.
Вучиз икI хьана? За жуван веревирдериз «Вуч гъалиб хьана?» кьил ганва. Гъалиб хьанвайди инсан я. «Вуж гъалиб хьана?» — лугьун лазим тир. Амма…
Зи кьатIунрай, зи суалди парабурув веревирд ийиз тазва. Къенин аямда, жуьреба-жуьре сиясатрин, динринни къурулушрин къарши къуватрин къаришмайри кьунвай дуьньяда, гьихьтин регьбер, камаллу карчи, ихтибарлу инсан уьлкведиз, халкьдиз герек ятIа, чир хьун лазим я.
Демократияни халкьди амалзавайди, халкьдин ниятриз жаваб гузвайди хьун лазим я. Америкадинни Европадин «демократия» гьикьван михьиди, ачухди, халкьдин итижрихъ галаз кьазвайди ятIа, чаз аквазва. Пачагьдин тахт кьун паталди лап чIехи тIварар чпел алай векилрини чпи чеб кьацIур тийизвай тегьер авач.
Парабуру «демократиядин» кьилин лишанрикай сад чапхунчивал, акьалтIай вагьши дявекарвал яз гьисабзава. Байденар, трампар, клинтонар, макронар, жонсонар, щольцар ва масабур вужар я? Абурун «демократиядин» гуьгъуьна аваз фейитIа, Наполеонни Гитлер виридалайни чIехи «демократар» тир жеди. Амма дуьньядал абуру вуч гъанатIа, вуч тунатIа, тарихда гьатнава. Тарих еке шагьид ва муаллимни я. Абурукай дуьз тарс, нетижа хкуд тавуртIа, чун гьакъикъи демократиядин, регьбердинни ихтибарлу инсандин гъавурда садрани акьадач. За гьавиляй «Вуч гъалиб хьана?» суал вилик гъанва.
Президент Путин гъалиб хьуниз къиметар гузвай чIехи пай политологри, депутатри, сиясатдин маса векилри къейдзавайвал, чи регьберди ахьтин гьуьрмет ва ихтибар сифтени-сифте вичин гьакъикъи демократвилелди, яни Ватандиз ва халкьдиз вафалу хьуналди, абуруз гъейратлувилелди къуллугъ авуналди, вичин гзаф терефрин бажарагъдалди, чIехи Россиядин, адан гзаф миллетрин динрин, культурайрин, адетрин халкьдин — Россиявийрин (и гаф за чIехи гьарфунилай кхьизва) уьмуьрдалди, къайгъуйралди яшамиш хьуналди къазанмишнава! И кар чнани кьетIендиз гьиссзава ва къейдзава!
В.В.Путина вичин гзаф рахунра, нубатдин сеферда РФ-дин Федеральный Собранидиз рекье тунвай Чарчени регьбердин уьмуьр Ватандинни халкьдин къуллугъда эцигнавайди хьун лазим я лагьанва. Гьукумдин чешме, къуват халкь я. Халкьди сечки авурдакай жезва демократия ва адан регьбер. Маса са демократияни авайди туш. И кар чаз гьакьван «вилик фенвайди» яз гьисабзавай Европадинни Америкадин тарихдайни, къенин йикъарайни аквазва. Амма абур чал чпин «демократия» илитIиз алахънава. Чна чи дикъет, сидкьи, садвал квадарайтIа, сиясатдин жигьетдай савадсузвал, къайгъусузвал къалурайтIа, чун алатнавай 1990-йисарин чукIурунризни тарашунриз, гъейратсузвилеризни ахлакьсузвилериз, руьгьдин лукIариз мад сеферда элкъуьн хъувун мумкин я.
Европадин «савадлуйри» чал илитIзавай кьван къадагъайри куьн гьакъиндай шагьидвалзава?
Алатнавай сечкийри субутзавайвал, гъалиб хьайиди чи обществодин савадлувал, садвал, регьбердиз, инал санлай чи гьукуматди кьунвай рекьиз, ихтибарун я.
В.В.Путина сечкийрилай гуьгъуьниз гайи вири интервьюйра алай вахтунда Президентдин патав хъсан команда арадал атанвайди къейдна. Алай четин девирда, чи баркаллу рухвайрини рушари, санлай вири халкьди, Ватандин ЧIехи дяведа чи чIехи бубайри хьиз, Ватандин азадвал, фашизмдин тIегъуьндикай чи халкь, гележег хуьн паталди женг чIугвазвайла, чи садвал къалурунихъ гекъигун авачир къуват хьанва! Ваъ лагьана вири душманриз. Чун гьахълу тирди ва гъалибни жедайди субутна. Ингье генани и сечкийра вуч гъалиб хьанатIа! Чи инанмишвал, Ватан патал чанни эцигиз гьазурвал къалурун — им я кьетIен гъалибвал!
Мердали Жалилов,
РФ-дин ва РД-дин культурадин лайихлу къуллугъчи
