Дагъустанда, къанун-къайдадин истемишунрал амал тавуна, тешкиллувал авачиз, кардик кутунвай алишверишдин чкайрин вилик пад кьаз гзаф йисар я. Кьиле тухванвай кIвалахрин нетижада 2015-йисалай инихъ ихьтин чкайрин кьадар 70 процентдин тIимил хьанва.
Ислен юкъуз РД-дин Кьил Сергей Меликован регьбервилик кваз кьиле фейи совещанидал республикадин промышленностдин ва алишверишдин министр Низам Халилова хабар гайивал, регионда къанунсуз алишверишдин вилик пад кьун патал кIвалахзавайбурун махсус десте арадал гъанва. И дестеди алишверишдин 18 агъзурдалай виниз чкаяр ахтармишна, алатай йисан сентябрдилай инихъ «хъендик» квай 980 карчи налогрин къурулушда регистрация авуна.
Къанунсуздаказ алишвериш тешкилнавай са шумуд чка тамамдиз агална. Абурун арада Дербент шегьердин куьчейрин къерехра жуьреба-жуьре затIар маса гузвай чкаяр, Хасавюртда «Ярык-су» вацIун винел кардик кутунвай базар ва Махачкъалада алишверишдин «Узбекистан» центрадин къваларив эцигнавай 20 павильон ава.
«Лезги газет»
