26-мартдиз Дагъустан Республикадин Гьукуматдин Председатель Абдулмуслим Абдулмуслимован иштираквал аваз, РД-дин эцигунрин, архитектурадин ва ЖКХ-дин министерстводин коллегиядин гегьенш заседание кьиле фена. Анал министерстводи 2023-йисуз авур кIвалахдин нетижайрихъ ва гъилевай йисуз вилик эцигнавай везифайрихъ яб акална. Коллегиядал и хилен гуьзчивилинни надзордин кIвалахдин нетижайриз къимет гана, етим аялар яшайишдин кIвалералди таъминарунин, шегьерра эцигунар кьиле тухунин ва маса месэлаярни веревирдна.
— Эцигунрин хел алай вахтунда экономикадин дестек, локомотив я, — лагьана Абдулмуслим Абдулмуслимова. — Адаз серф ийизвай кьван такьатри, адет яз, республикадин хейлин хилер вилик тухуниз куьмек гузва, гзаф кьадар инсанар кIвалахдалди таъминарзава, бюджетдиз къвезвай налогрин такьатрин кьадарни артухарзава. И хел вилик финин нетижаяр кьуналди ва гележегда адаз авай мумикинвилер къейд авуналди, лугьуз жеда хьи, республикадин эцигунрин, архитектурадин ва ЖКХ-дин министерстводихъ тарифдай хейлин агалкьунар ава.
Агьалийриз яшайишдин жигьетдай куьмек гунин кIвалахдикай рахадайла, премьер-министрди къейдна хьи, 2023- йисуз 48 агъзурдалай виниз хизанриз яшайишдин шартIар хъсанарунин карда куьмек гана.
«Идалайни гъейри, Дагъустандин набут аялар авай 133 хизандив яшайишдин кIвалер къачун патал сертификатар агакьна. Куьгьне ва ацахьдай гьалда авай кIвалерай (4354,85 кв.метр) 264 кас цIийи кIвалериз акъудна. Жегьил хизанар яшайишдин кIвалералди таъминаруниз талукь программадин сергьятра аваз, 27 хизандиз герек кьадар пулдин такьатар гана. ГьакIни республикада сифте яз 189 етим аялдиз яшайишдин шартIар хъсанарун патал куьмекна», — лагьана А.Абдулмуслимова.
Министерстводин кIвалахдин хъсан нетижайрал акъвазуналди, премьер-министрди федеральный ва региондин милли проектар уьмуьрдиз кечирмишзавай кIвалахни къейдна.
ИкI, «Шегьердин къулай шартIар тешкилун» федеральный проектдин сергьятра аваз, 144 майдан аваданламишна. Ида чкайрал региондин 1,5 миллион агьалидин шартIар хъсанарна. Идалайни гъейри, региондин программадин сергьятра аваз, алатай йисуз гзаф квартирайрин 150 кIвале бинедилай ремонтдин кIвалахар тамамарна.
Гьукуматдин Председателди мярекатдал региондин мулкуна агьалияр хъвадай целди таъминарун патал уьмуьрдиз кечирмишзавай проектарни рикIел хкана. Абурук «Чиркей-Махачкъала-Каспийск» водоводни акатзава. 2025-йисан эхирра и проектдал кIвалах тамамарайла, 900 агъзур агьали хъвадай михьи целди таъминарда. 2023-йисан эхирра ишлемишиз вахкай «Чиркей-Буйнакск» водовод себеб яз, исятда хейлин хуьрерин агьалийри михьи яд хъвазва. Гъилевай йисан эхирдалди цихъ галаз алакъалу мад кьуд объект ишлемишиз вахкуда. Абуру 48,87 агъзур кас хъвадай целди таъминарда.
РД-дин эцигунрин, архитектурадин ва ЖКХ-дин министрдин везифаяр вахтуналди тамамарзавай Александр Нестерова министерстводин коллективди алатай йисуз тухвай кIвалахдикай гегьеншдиз суьгьбетна. Докладчидин гафаралди, алава мумкинвилер жагъурна, федеральный цIийи программайра иштиракуни, федеральный бюджетдай финансрин такьатар ахъайиз туналди, бюджетдинбур тушир такьатарни ишлемишуналди, кар алай месэлаяр гьялуниз талукь яз 2021-йисуз вилик эцигай везифаяр кьилиз акъуддай мумкинвал хьана.
Александр Нестерова ЖКХ-дин къурулуш цIийикIа туькIуьр хъувунин программа уьмуьрдиз кечирмишзавай гьалдикай, чиркин ятар михьдай имаратар цIийикIа туькIуьр хъувуникай, мулкар комплекснидаказ вилик тухуникай, регионда аялрин бахчаяр, школаяр эцигуникай, гзаф квартирайрикай ибарат кIвалера ремонт кьиле тухуникай, «Шегьердин къулай шартIар тешкилун» федеральный программа уьмуьрдиз кечирмишуникай суьгьбетна.
Министерстводин гуьзчивилинни надзордин кIвалахдин нетижайрикай доклад министрдин заместитель Шамил Абдулмуталибова авуна. ИкI, шаз республикада 433 ахтармишун кьиле тухвана, хейлин татугайвилерни дуьздал акъудна. Алатай йисуз гьакI профилактикадин 188 серенжемни кьиле тухвана.
Мярекатдал министерстводин хиле зегьмет чIугвазвай хейлин ксарив федеральный ва региондин шабагьарни вахкана.
Хийир Эмиров
