Сулейман-Стальский райондин алатай асирдин эхирда куьгьне Мамрач хуьруьн мулкара цlийиз арадал хтанвай Цlийи Мамрач хуьруь 2015-йисуз РД-дин Халкьдин собранидин депутатрин къарардалди официальный статус къачуна.
Райондин администрациядин пресс-къуллугъди «Лезги газетдиз» хабар гузвайвал, Герейхановский хуьруьн составдик акатзавай и хуьре 418 майишат ава. хуьруьз официальный статус гайидалай кьулухъ ам абадвилихъ тухунин месэлаяр райондин руководстводи гуьзчивилик кутунва. Алай вахтунда арадал атанвай нетижаярни метлеблубур я. Кьилди къачуртlа, куьчейриз хирхем вегьенва, трансформаторрин подстанцияр тайинарнава, экв тухванва, агьалияр хъвадай целди таъмин я ва икl мадни хейлин яшайишдихъ галаз алакъалу месэлаяр гьялнава.
Къейд ийин, хуьр абадвилихъ тухунин кlвалах давам жезва ва яваш-яваш хуьруьнэгьлийрин месэлаяр гьялзава. Ина иллаки электричестводин месэла хцидаказ акъвазнава. Хуьруьн къене са кьадар чкайра газдин турбаяр авачирвиляй, кlвалер чими авун патал агьалийри токдин пичер ишлемишзава.
Ток тухванвай линияр нормайрив кьазвачирвиляй четинвилер арадал къвезвай. Алай вахтунда хуьруьз гзаф вольтар авай цlийи линия тухузва ва цlийи трансформатор (250 Вт.) эцигзава.
Кlвалахар ООО «Электростандарт» тешкилатди кьилиз акъудзава. И кlвалахар кьилиз акъудун патал райондин бюджетдай 400 агъзур манат чара авунва. Герейхановский хуьруьн кьил Руслан Алдирова къейд авурвал, гъиле кьунвай кlвалахар тамамвилелди гьялда.
«Лезги газет»
