“Лезги газетдин” редакцияда цIийи кьилелай туькIуьр хъувунвай, алай аямдин истемишунрив кьадай конференцийрин залда сад лагьай мярекат — “Лезги хуьр” лишандик кваз документрин бинедаллаз арадал гъанвай фильмрин международный конкурсдин нетижаяр кьунин, финалистрив наградаяр вахкунин серенжем кьиле фена.
Конкурсдин тешкилатчияр лезгийрин медениятдин Харьковда кардик квай “Самур” тешкилат ва “Лезги газетдин” редакция тир. Серенжемдин призрин фондуни 100 агъзур манат тешкилнавай. Лагьана кIанда, “Лезги хуьр” конкурс алатай йисан эвел кьилера малумарнай. “Самур” тешкилатдихъ ихьтин конкурсар гележегдани тухудай фикирар ава.
Финалдиз Азербайжан пата яшамиш жезвай лезгийрин машгьур шаир, “Самур” газетдин кьилин редактор Седакъет Керимова, “Дагъустан” РГВК-да “Вахтар ва инсанар” передача кьиле тухузвай Исамудин Агьмедов, ери-бине Хуьруьгай тир, алай вахтунда Тюменда яшамиш жезвай Сади Омаров акъатна.
Мярекатдиз “Самур” тешкилатдин председателдин заместитель Бедел Беделов, анин крар идара ийидай директор Феликс Нагъиев, конкурсдин жюридин гьуьрметлу членар, Дагъустандин СМИ-рин векилар ва Азербайжан Республикадай делегация атанвай.
Мярекат гатIундайла “Лезги газетдин” кьилин редактор Мегьамед Ибрагьимова конференц-зал цIийикIа туьхкIуьр хъувур кьегьал хва, эминхуьруьнви Шагьпаз Асахановаз, куьмекар гайи Билбил-Къазмайрилай тир Пакизат Рагьимхановадиз сагърай лагьана ва абурув чухсагъулдин чарар вахкана.
Конкурсдин нетижаяр кьадалди вилик Феликс Нагъиева адан иштиракчийрин рикIел серенжемдин истемишунар хкана. ИкI, конкурсдин кьилин макьсад чи багъри ерийрин тарих, хуьрерин ва анрин агьалийрин надирвал, къадим адетар ва чи халкьдин ацукьун-къарагъун къалурун, фильмрин куьмекдалди абур жегьил несилрив агакьарун тир.
Ихьтин конкурс тешкилунин фикир гьикI арадал атайди я лагьай суалдиз Феликс Нагъиева ва Бедел Беделова жаваб гайивал, гьеле алатай асирдилай башламишна неинки лезги, дагълух вири хуьрерай агьалияр дуьзенриз куьч жезва. Ихьтин себебрикди цIудралди хуьрер къе саки амач. Такабурлу дагъларин къужахда амайбур бубайрин сурарни бязи хуьрерин кIвалерин хандакIар я.
— Къе чна а хуьрерикай делилар кIватIун, абур несилриз чирун, дагълара авай тIебиатдин девлетрикай жегьилри менфят къачун герек я. Чна къадим, хайи хуьрериз-маканриз гьуьрметна кIанда. Абур чаз бубайри багъишнавайбур туш, вахтуналди вуганвайбур я. Абурукай авай делилар кIватIна, къведай несилрив агакьарун чи буржи я. Са девирра гурлу уьмуьр кьиле фейи анриз хъфидай халис дагъви руьгь квай кьегьаларни белки пайда жен, — къейдна Ф.Нагъиева.
Ф.Нагъиева цIинин конкурс Харьковда авай лезгийрин медениятдин “Самур” тешкилатдин 10 йисан юбилейдиз талукьарнавайди тирди къейдна ва вири иштиракчийриз сагърай лагьана. Адан гафарай малум хьайивал, конкурсдиз 18 фильм ракъурнавай. КIуьд касдикай ибарат комиссиядин членри рейсадвилелди Яйла (Туьркия), Кухур (Азербайжан) хуьрерикай фильмаяр туькIуьрай Седакъет Керимовадиз 1-чка гана. Адав “Самур” тешкилатдин патай диплом, пулдин премия ва Харьков шегьердикай кхьенвай ктабар вахкана.
Кьвед лагьай чкадиз Къара-Куьредикай фильм туькIуьрай Исамудин Агьмедов, пуд лагьай чкадиз Хуьруьгрин хуьруькай фильм арадал гъайи Сади Омаров лайихлу хьана.
Дипломралди ва пулдин премийралди гьакIни Лезги радиодин къуллугъчи Нарима Жамаловадин “Испик” ва шаир Шагьабудин Шабатован “Илиф Макьаз” фильмаярни къейдна.
Конкурсдин финалистрив талукь дережайрин дипломар вахкайдалай кьулухъ “Самур” тешкилатдин векилри чпихъ галаз датIана алакъаяр хуьнай, ихьтин мярекатар тешкилиз куьмекар гунай, Украинада яшамиш жезвай ватандашрикай халкь хабардар авунай “Лезги газетдин” редакциядин коллективдив Гьуьрметдин грамота вахкана.
Гуьгъуьнлай мярекатдин иштиракчийри Россия, Азербайжан, Украина уьлквейра яшамиш жезвай лезгийрин дуланажагъ, абуруз талукь месэлаяр веревирдерна, чи халкьдин яшайиш хъсанарун, лезгийрин къадим тарих, меденият, ацукьун-къарагъун хуьн, несилрив агакьарун патал меслятар гана. Мярекатда иштиракай гьар сада ватанпересвилин руьгьдалди къе Украинада чпин лезгивал хуьзвай “Самур” тешкилатдин вири членриз сагърай лагьана.
Дагъви Шериф
