19-мартдиз Махачкъалада РД-дин Кьил Сергей Меликован регьбервилик кваз кьиле фейи совещанидал веревирд авур месэлайрикай сад иесисуз кицIерихъ галаз алакъалуди тир. Дагъустанда и месэла гьялун патал кьабулзавай серенжемрикай вице-премьер Нариман Абдулмуталибова суьгьбетна.
Адан гафарай малум хьайивал, 2022-йисав гекъигайтIа, шаз иесисуз кицIерин кьадар тIимил хьанва. Анжах им месэла амач лагьай чIал туш. Эхиримжи 3 йисан къене ахьтин кицIер кьун патал кьиле тухузвай мярекатриз республикадин бюджетдай 82 миллиондилай виниз пулдин такьатар чара авуна.
Лагьана кIанда, иесисуз кицIерикай инсанар патал авай хаталувални фикирда кьуна (республикадин жуьреба-жуьре шегьерра ахьтин кицIери инсанрал вегьей дуьшуьшарни малум я), и месэла гьялуниз регионда кьетIен фикир гузва. Мисал яз, алай вахтунда Дербентда вахтуналди ахьтин кицIер хуьдай махсус чка (приют) эцигна акьалтIарнава. Ихьтинбур республикадин мад са шумуд муниципалитетда эцигдайвал я.
ГьакIни чпин кицIер, герек амач лагьана, куьчейриз ахъайзавайбур жавабдарвилиз чIугун патал региондин дережада аваз кьабулнавай къанундик дегишвилер кухтада.
Чи мухбир
