18-мартдиз Дагъустандиз РФ-дин экономикадин рекьяй вилик финин министр Максим Решетников мугьман хьанвай. Ина федеральный дережадин ведомстводин кьили ципицIчивилин, туризмдин хилер вилик тухунин месэлайриз талукьарнавай совещанияр кьиле тухвана, Къизляр, Дербент шегьерриз, Дербент райондиз фена.
Агъадихъ чна М.Решетникова кьиле тухвай совещанийрал веревирд авур месэлайрикай куьрелди гузва.
Максим Решетников Дагъустандин Кьил Сергей Меликовахъ галаз Къизлярдин коньякардай заводдиз фена ва карханадин мумкинвилериз къимет гана. Заводди РФ-дин экономикадин рекьяй вилик финин министерстводихъ галаз 2024-2026-йисара ципицIчивал ва чехирчивал вилик тухун патал инвестицийриз талукь икьрар кутIунна. Дагъустанда государстводи чара ийизвай такьатрин куьмекдалди ципицIчивилин ва чехирчивилин хилера кIвалахдай 900 чка арадал гъанва.
Дербент районда кьиле фейи совещанидал Дагъустандин экономикадин кар алай хилериз талукь месэлаяр веревирдна. 2025-йисуз республикада Каспий гьуьлуьн къерехда арадал гъидай кластердин сад лагьай объектар эцигиз гатIунда. Махачкъаладин аэропортунинни Дербент шегьердин арада пассажирар санай масаниз тухудай улакьар кардик кутада. Дагъустанда аялрин центр эцигунин кIвалахрин сад лагьай паюна кIвалахдай 400 чка арадал гъида.
Максим Решетникова республикада ЖКХ-дин хел цIийикIа туькIуьр хъувунин жигьетдай кьиле тухванвай кIвалахриз ва региондихъ авай мумкинвилериз еке къимет гана. Ада къейд авурвал, Дагъустанда вири уьлкведин экономика патал чIехи метлеб авай проектар кьилиз акъудзава.
Сергей Меликова Кеферпатан Кавказдин республикада экономика вилик тухунин карда санал кIвалахунай Максим Решетниковаз сагърай лагьана.
Гегьеншдиз — РД-дин Кьилин сайтдай кIелиз жеда.
Агьмед Магьмудов
