Ахтармишунри къалурзавайвал, Дагъустанда яшайишдин цIийи кIвал эцигун патал лазим жезвай вахт 6 йисалай гзаф я. Ихьтин делилар кIвалер эцигзавайбурун сад тир ресурсди (ЕРЗ) гъизва.
И сиягьда Дагъустан, уьлкведин амай вири субъектрив гекъигайла, 75 лагьай чкадал ала. Малум хьайивал, республикада цIийи кIвал эцигун патал юкьван гьисабдалди тахминан 2000 югъ лазим жезва. Гьа са вахтунда Дагъустан, квадратурадал гьалтайла, виридалайни чIехи цIийи кIвалер эцигзавай регион я (юкьван гьисабдалди 16 агъзур кв.метрдилай гзаф). Мертебайрин кьадар юкьван гьисабдалди 12-далай гзаф я. Къейд ийин, кIвалер эцигунин йигинвилел гьалтайла, кIвенкIвечи чка Новгороддин областди кьунва — ина кIвал юкьван гьисабдалди 303 юкъуз эцигзава, Коми Республикада — 384 юкъуз (2-чка), Томскдин областда -385 юкъуз.
Яшайишдин кIвалер маса гунал-къачунал машгъул ресурс тир ЦИАН-дин делилралди, уьлкведа кIвалерин къиметар виридалайни йигиндаказ хкаж жезвай шегьеррин сиягьда сад лагьай чка Каспийскди кьунва. Эхиримжи 5 йисан вахтунда ина квартирайрин къиметар виридалайни йигиндаказ хкаж хьанва — 4,4 сеферда. ИкI, эгер 2018-2019-йисарин сад лагьай кварталда кв. метрдин юкьван къимет 26 агъзур манатдиз барабар тиртIа, 2023 ва 2024-йисарин сад лагьай кварталра ам 110 агъзур манатдилай алатна.
Амина Муслимова
