Вахт санал акъвазнавач, ам, датIана авахьзавай гурлу вацI хьиз, гьерекатдик ква. Тарихдин са куьруь вахтунда дуьньядин карта, гьалар лап дегиш хьанва. Яшлу ксариз чпин уьмуьрда лап фад хьайи крарни накь, вилик квай йикъара хьайибур хьиз аквада… Цналви зани зи дуст, мукьва-кьили, фиригъви Абдулазизов Улубая алатай асирдин 50-йисарин юкьвара Хивда школа-интернатда санал кIелнай. Анаг акьалтIарайла, чун къакъатна. Ам — Москвада хуьруьн майишатдин академиядиз, зун Махачкъалада ДГУ-диз гьахьна.
КIелунар акьалтIарайдалай гуьгъуьнизни чун мукьвал-мукьвал сад-садаз аквадай, хийир-шийирдик жедай, кIвалахдин рекьяй сад-садал алукьдай. Адазни, зазни Хив райондин «Сафаралиевский» совхоздин директорвилин везифаяр кьиле тухун кьисмет хьана. Чна гьукуматдиз, халкьдиз агъзур тоннралди хуьруьн майишатдин — малдарвилин, магьсулдарвилин продуктар гьасилунин, маса гунин кардани жавабдар къуллугъ кьиле тухвана. Гзаф мергьяматлу, инсанперес кас тир Абдулазизов Улубаякай за виликдай кхьенай. Къенин макъалада заз адан уьтквем хцикай — Гьалаудин Абдулазизовакай суьгьбет ийиз кIанзава.
Гь.Абдулазизов Фиригърин хуьре 1965-йисан 30-июндиз дидедиз хьана. 1971-1982-йисара ада ЦIийи Фиригърин школада кIелна, анаг хъсан къиметралди акьалтIарна. 1983-1985-йисара ада СССР-дин Яракьлу Къуватрин жергейра къуллугъна.
Армиядай хтай уьтквем жегьил ДГУ-дин экономикадин факультетдиз гьахьна. Анаг агалкьунралди куьтягьай жегьил пешекар Брянскдин областдиз кIвалахал рекье туна. Ина вичин везифаяр гьакъисагъдаказ кьиле тухвай ам гуьгъуьнлай Дагъустандиз хтана.
1992-йисуз ам Дагъустандин МВД-да жавабдар къуллугъдал тайинарна, ада ОСН-дин взводдин командир яз кIвалахна. Гуьгъуьнлайни ада Дербентдин ГОВД-да ОБЭП-дин оперуполномоченный, 1998-йисалай и отделдин начальник яз гьакъисагъвилелди вичин хиве авай везифаяр кьилиз акъудна.
РикIел хкун тавуна жедач, а вахтар четинбур, халкьдин арада низам-къайда амачирбур, гьар районда бандитрин дестейри кьил хкажнавайбур, Ельцина США-дин кьиле авайбурун писпидал кьуьлзавайбур тир.
Хив райондин ОВД-дани крар пайгардик квачир. Къанун-къайда тунин кIвалахда агалкьунар авай къенепатан кьушунрин жавабдар къуллугъчи Гь.Абдулазизов Дагъустандин МВД-ди Хив райондин ОВД-дин начальниквиле рекье туна. И райондин тамарани инлай-анлай террористри «гумар акъудзавай». КIвалахда лигим хьанвай бажарагълу регьбер Гь.Абдулазизова сифте РОВД-дин еке коллективда къайда туна. Ахпа жемиятдин куьмекни галаз районэгьлияр, абурун мал-девлет хвена. Хаталу тешкилатар тергна.
2000-йисуз викIегь командир мадни жавабдар къуллугъдал — Кьиблепатан Дагъустандин районрин ОБЭП-дин начальниквиле тайинарна. 2002-2007-йисара ам МВД-дин криминальный милициядин начальникдин заместитель тир.
Гьалаудин Абдулазизоваз уьмуьрда секинвал чидач. Отставкадиз фейидалай гуьгъуьниз (2007-2008-йисара) ада Дагогни шегьердин администрацияда чилерин ва эменнидин отделдин начальниквиле зегьмет чIугуна. 2008-йисалай терроризмдиз акси комиссиядин отделдиз регьбервал гузва.
Къанун-къайда хуьнин рекье дурумлудаказ кIвалахзавай игит хва гьукуматдин цIудалай виниз чIехи шабагьриз лайихлу хьанва. Чи мурад адахъ, гьакIни намуслудаказ, гьакъисагъвилелди хайи халкьдиз, Ватандиз къуллугъзавай виридахъ мягькем сагъламвал, хизанра хушбахтлувал хьун я.
Рамазан Велибегов,
тарихчи, РФ-дин писателрин ва журналистрин союзрин член
