9-мартдиз полициядин дежурный частуниз СтIал Сулейманан райондай тир 35 йиса авай агьали арза гваз атана. Ада малум тушир касди вичин 260 агъзур манатдин къимет авай «ВАЗ-217030» автомашин чуьнуьхнавайдакай хабар гана.
Итимдин гафаралди, нянин вахтунда ада иесийрив заказар агакьарзавай ва машин Белиждин туьквендин патав акъвазарнавай. Машин худ кваз туна, ам 10 декьикьада патав гвай гастрономдиз гьахьна. Машин юзайди чир хьанмазди, итим тадиз куьчедал экъечIна, машин акъвазариз алахъна. Вичелай и кар алакь тавурла, ам полициядиз арза гваз атана.
Полициядин къуллугъчийри тади гьалда кьабулай серенжемрин нетижада тахсиркарвал авунай шак физвайди кьуна. Ам Махачкъаладай тир 46 йиса авай агьали яз хьана. Адан гафаралди, ички хъванваз, ам посёлокда къекъвезвайла, чкадин туьквендин патав адаз водитель авачир худ янавай машин акуна ва ам гьалунин темягь аваз гваз катун кьетIна.
Тахсиркарвал авунай шак физвай кас ички хъванваз машин гьалун себеб яз правайрикай магьрумнавайди тестикьарнава.
Машин гваз катунай РФ-дин УК-дин 166-статьядай уголовный дело къарагъарнава.
* * *
11-мартдиз полициядин дежурный частуниз Каспийскдай тир 42 йисан яшда авай агьалиди вилик квай йифиз малум тушир пуд касди, гужуналди адан кIвализ гьахьна, анай 45 агъзур манат пул ва мобильный телефон чуьнуьхайдакай хабар гана.
Полициядин къуллугъчийри тахсиркарвал авунай шак физвайбур кьуна ва отделдиз хкана. Абур 32 ва 25 йисара авай чкадин агьалияр яз хьана.
Итимри чеб зарар гайи касдин кIвализ дуьшуьшдай гьахьайдакай лагьана. Абуру, фикир тагана, и квартирадин рак гатана. Анай экъечIай итим текдиз авайдал шак фена. ЧIуру ниятар авайбур кIвализ «мугьман хьана». Абурукай сад кIвалин иесидихъ галаз рахазвайла, амай кьвед «къекъвез» башламишна. Пул ва телефон жагъайла, абур вахчуна, тадиз анай экъечIна.
Чуьнуьхай телефон итимри гадарнавай, пул гьамамда ял ягъуниз харжнавай.
Тахсиркарвиляй материал кIватIнава.
«Лезги газет»
