Мергьяматлувал

Сергей Меликова кьил кутур «Хайи мектебдиз савкьат ая» серенжемдин тереф хуьзвайбурун кьадар йикъалай-къуз артух жезва. Чаз малум хьайивал, мукьвара, эстафетадин сергьятра аваз, СтIал Сулейманан райондин кьил Саид Темирханова Кьасумхуьруьн 1-нумрадин мектебдиз спортдин тадаракар пишкешна. Ада къейд авурвал, гъвечIиди ятIани, школьникар физический рекьяй еримлу авуник пай кутун шадардай кар я. 

«Мектебда кIелзавайбуруз спортдал машгъул жедай рекьер ачухун гзаф важиб­лу я. Физкультурадин менфятлу,­ итижлу тарсар тухун патал герек тир спортдин метягьар чарасуз я. Спортдал машгъул жедай шартIар тешкилун кар алай тапшуругърик акатзава. Аялрихъ спортдай авай алакьунар неинки винел акъудун, гьакI абур еримлуни авун герек я», — лагьана С.Темирханова.

Ада алава хъувурвал, райондин сергьятра алай аямдин спортдин майданар, гьа жергедай яз футбол къугъвадайбурни, туькIуьрна ва и кIвалахар идалай кьулухъни давамарда.

Серенжемдин эстафета ада райондин депутатрин собранидин председатель Ш.Мегьамедхановав вахкана.

*  *  *

СтIал Сулейманан райондин Агъа СтIал­рин хуьруьн администрациядин кьил Надир Эфендиевани «Хайи мектебдиз савкьат ая» серенжемда иштиракна. Адани вичин хуьруьн мектебдиз спортдин тадаракар савкьатна.

Шад гьалара мектебдив савкьатар вахкай мярекат­дал Н.Эфендиева муаллимриз кIвалахда агалкьунар алхишна, аялриз хъсандиз­ ­кIелуниз, халисан ватанпересар хьуниз эвер гана. Директорди пишкешар гунай сагърай лагьана.

Къейд ийин, Н.Эфендиева эстафета­­ хайи мектебдиз лезги чIаланни­ эде­б­и­ят­дин тапшуругърикай ибарат 200 ктаб пишкешай Россиядин журналистрин­ Со­юз­дин РД-дин отделенидин ре­ви­­зиядин комиссиядин председатель М.Мегьа­мед­­керимовавай кьабулнай.

«Лезги газет»