Дагъустандин бюджетдай рекьер туь­кIуь­­рун патал  гьар йисуз миллиард манатралди пул чара ийизва. Амма, ятIа­ни, гьалар хъсан патахъ дегиш жезвач: республикада икьван чIавалди гзаф кьадар рекьера къир цанвач, “барбатI хьанвай”, яни бинедилай ремонт авуна кIан­за­вай рекьерни гзаф я, шегьеррин ва поселокрин къенепатарин бязи куьчеяр авай гьалдикай гьич раханни тийин. И гьаларин нетижада  агьалийрин патай арзаяр гзаф ва властдиз ихтибар тIимил хьунал гъизва.

Хейлин кьадар такьатар чара ийизва­тIа­ни, Дагъустанда рекьер къайдадиз хкиз вучиз жезвач? И суал республикадин руководствода арадал атана, нетижада талукь тир ахтармишунар кьиле ту­хун теклифнава. Гьа икI, гьар гьафтеда тешкилзавай планер­кадал рахадайда, Дагъустандин Кьилин везифаяр вахтуналди тамамарзавай Владимир Васильева итижлу рекъемар раижна. Ма­лум хьайивал, рекьер туь­кIуьрун патал чара авунвай 2 миллиард манатдикай анжах 1,2 миллиард манат тайин тир­вал харжнава. Амай 800 миллион ма­нат, ада гъавурда турвал, карханайрин арада  “къугъунар” ийидайла, “пайи-паяр хьана”.

“Алай вахтунда и делилдиз талукь яз уголовный дело къарагъарнава. Ихьтин дело икьван чIавалди неинки Да­гъустанда, гьакI Россияда, санлай къачурла, хьайиди туш”, — къейдна региондин руководителдин везифаяр тамамарзавайда.

Ада вири чиновникар, рекьер туь­кIуь­­ру­нихъ галаз алакъалу пешекарар тагькимарна: икI мад жедач. “Къанун”, “къайда”, “кьадар” лугьудай затIар авайди я ва абуру кIва­лахна кIанда”, — малумарна В.Васильева.

Чи мухбир