Алай йисан сад лагьай паюна Дагъустанда коррупциядиз талукь тахсиркарвилерай 176 уголовный дело къарагъарнава.
Алатай гьафтеда Россиядин Силисдин комитетдин Дагъустанда авай Управленида алай йисан сад лагьай паюна кьиле тухванвай кIвалахрин нетижайриз талукьарнавай совещание кьиле фена.
Управленидин регьбер Сергей Дубровина къейд авурвал, 2018-йисан сифтегьан ругуд вацра РФ-дин Силисдин комитетдин РД-да авай Управленидиз тахсиркарвилериз талукь 3400-лай виниз хабарар атана. Силисчияр уголовный 1400 делодиз килигна, абурукай 725 прокуратурадизни суддиз рекье тунва.
Вичин рахунра С.Дубровин коррупциядиз талукь тахсиркарвилерал гегьеншдиз акъвазна. Адан гафарай малум хьайивал, алай йисан сад лагьай паюна ихьтин тахсиркарвилерин жигьетдай Управленидиз 358 хабар атана. Абуруз талукь делилар ахтармишунин нетижада 176 дуьшуьшда уголовный дело къарагъарнава. Абурукайни суддиз 102 дело рекье тунва.
Сергей Дубровина РФ-дин Силисдин комитетдин РД-да авай Управленидин къуллугъчийриз кIвалахдин рекьяй хиве гьатзавай везифайривни мажбурнамайрив жавабдарвилелди эгечIуниз эвер гана. “Тахсиркарвилериз талукь гьакъиндай ахтармишунар кьиле тухудайла, герек тир серенжемар вахтунда кьабулуниз ва абур къанун-къайдадив кьадайбур хьуниз кьетIен фикир це. И кардал Россиядин Силисдин комитетдини датIана гуьзчивал тухузва”, — лагьана С.Дубровина Управленидин къуллугъчийриз.
Чи мухбир
