РД-дин Кьил Сергей Меликова региондин «Память Гор» фонд тешкилунин тереф хвена.
«И мукьвара зун СВО-дин иштиракчияр тир лайихлу гадайрихъ галаз таниш хьана. Абуру военный махсус серенжемда иштиракзавайбуруз куьмек гун патал «Память Гор» фонд тешкилунин гьакъиндай теклиф гана. Им лап хъсан фикир я. Социальный сетра идан тереф хуьзвай ватанэгьлиярни тIимил туш.
Дагъустанда регьимлу инсанар пара ава. Абуру чи аскерриз чпелай алакьдай куьмекар гузва. Тешкилиз кIанзавай организациядин кьетIенвал адакай ибарат я хьи, адак квайбур СВО-да миллетбазрихъ галаз женг чIугвазвай, чи аскеррин дердияр хъсандиз чизвай, армияда къуллугъзавай ксар я.
Абурухъ галаз гуьруьшмиш хьайидалай гуьгъуьниз чна кIвалахдай са шумуд хел тайинарнава. Сифте нубатда СВО-дин иштиракчийрин ва абурун хизанрин месэлаяр гьялун, гел галачиз квахьнавай аскерар жагъурун, женгерай хтанвай дагъустанвияр кIвалахдалди таъминарун, залан хирер хьанвай аскерриз куьмек гун ва школьникрихъ, студентрихъ галаз ватанпересвилин кIвалах тухун.
Республикада региондин са отделение ва муниципалитетра адан ячейкаяр жеда. Тешкилатдин руководитель за жуван общественный куьмекчивиле тайинарда. Умудзава хьи, и мисалдилай муниципалитетрин кьилерини чешне къачуда.
Апрелдин вацра чна СВО-дин иштиракчийрин умуми сад лагьай конференция кьиле тухуда. Анал чаз ватан хуьзвайбурун месэлайрикай, дердийрикай чир жеда ва гьакI абуру республикадин гележег гьихьтинди хьана кIанзаватIа, гьадакайни лугьуда. И фикирар бинедиз къачуна, тешкилатди вичин кIвалахни тешкилда.
Нубатдин кам яз, Дагъустанда СВО-диз куьмек патал жемиятдин тешкилатрин Ассоциация тешкилда. Ида чи умуми вири кIвалахдиз куьмек гуда.
И крарал алава яз, мукьвара чна уьлкведин Президентди вичин Чарче лагьай «Игитрин вахт» программадин кадрийриз талукь тешкилатни арадал гъида. СВО-да иштиракзавай дагъустанвийрин арада пара бажарагълу, кар алакьдай инсанар ава. КIелдай, пешеяр къачудай мумкинвал гайила, абуру гьукумдин органра ва государстводин компанийра кар алай кIвалахар тамамарда», — кхьена Дагъустандин Кьили вичин телеграм-каналда.
«Лезги газет»
