РД-дин Кьил Сергей Меликова районрин ва шегьеррин администрацийрин регьберривай арзайриз вахтунда фикир гун истемишна. Республикадин Кьилин гафаралди, агьалийрин арзайриз чкайрал гъиле-гъил аваз фикир тагуни инсанар республикадин кьиле авайбуруз кхьиниз мажбурзава.
«Вучиз инсанри чпин арза-ферзе республикадин Кьилин тIварцIел ракъурзава? Вуч я, абур квехъ агъазвачни? Инсанри чпин къайгъуйрикай заз лугьуниз зун акси туш. Гьар са касдихъ галаз гуьруьшмиш жез ва абур гъавурда тваз гьазур я. ИкI хьайила, бес куьн низ герек къвезва?!» — лагьана Сергей Меликова районрин, шегьеррин кьилериз.
Ада Жемиятдин палатадин кIвалахдилайни наразивал авуна. Сергей Меликован фикирдалди, и органдиз республикада кьиле физвай вири вакъиайрикай хабар хьун лазим я. Инсанрик къалабулух кутазвай месэлайриз гъиле-гъил аваз фикир гудайвал ва гьукумдинни агьалийрин арада дуьзгуьн ихтилатар тешкилдайвал.
«Куь кьилин везифа жемиятдин игьтияжар тайинарун ва абур гьукумдив агакьарун я. Куьне республикадин Кьили тухузвай совещанийра, гьукуматдин ва парламентдин заседанийра иштиракзава. Квекай чна са месэлани чуьнуьхзавач. Къе гьукумдин вилик гьихьтин везифаяр кватIа, куьн гъавурда хьун лазим я. Абурукай чи агьалиярни хабардардайвал. Квез жемиятдик секинсузвал кутазвай месэлайрикай вахтундамаз хабар хьун лазим я. Герек вахтунда гьукумдин органрихъ галазни алакъа хуьдайвал. Амма гьелелиг ихьтин кар-кIвалах аквазвач», — баянар гана региондин регьберди.
Дагъустандин Кьили Жемиятдин палатадиз кIвалахда хъсанвилихъ дегишвилер туниз эвер гана.
Хийир Эмиров
