Алатай гьафтедин эхирра РФ-дин Госдумадин депутат Султан Хамзаева Махачкъалада Дагъустандин СМИ-рин векилрихъ галаз гуьруьш кьиле тухвана. Ана РД-дин информациядин ва печатдин Агентстводин кьил Абдуразакь Жамалутдинова, РФ-дин журналистрин Союздин Дагъустандин отделенидин председатель Мегьамед Ибрагьимова, республикада акъатзавай газетринни журналрин кьилин редакторри, мухбирри иштиракна.
РФ-дин журналистрин Союздин Дагъустандин отделенидин 65 йис тамам хьунин сергьятра аваз кьиле фейи и мярекатда хайи чIалар хуьниз ва вилик тухуниз, мектебар милли чIалар чирдай бес кьадарда ктабралди таъминаруниз, журналистрин ихтиярар хуьниз, абурун мажибар артухаруниз талукь месэлаяр веревирдна. С.Хамзаева журналистрин са жерге суалризни жавабар гана.
Гуьруьшдин эхирдай Султан Хамзаева Дагъустандин СМИ-ра кIвалахзавайбурув Госдумадин депутатдин патай Разивилин чарар вахкана. Шабагьдиз лайихлу хьайибурун жергеда «Лезги газетдин» редакциядин корректор Майрам Магьамдалиевани ава.
Къейд ийин хьи, Майрам Магьамдалиевадин бинеяр Кьурагь райондай я. Ада хайи чIалал акъатзавай газетдин редакцияда 1971-йисалай кIвалахзава — саки 53 йисуз! Чна Майрам Мирзалиевнадиз шабагь мубаракзава. Адахъ чандин сагъвални яргъи уьмуьр хьун чи мурад я!
Чи мухбир
