Жаванрин агалкьунар
Уьлкведин меркезда 28-февралдилай 5-мартдалди, «Москвадин ушудин гъетер — 2023» лишандик кваз, ушу-саньдадай кьиле фейи международный 9-турнирда, Россиядилай гъейри, Индонезиядай, Белоруссиядай, Индиядай, Къазахстандай, Къиргъизистандай, Китайдай тир 500-дав агакьна спортсменри чпин устадвал къалурна. ИкI, ана иштиракай чи ватанэгьли, вичин ери-бине Мегьарамдхуьруьн райондин Гарагърин хуьряй тир, алай вахтунда Каспийскда яшамиш жезвай Халид Сардарова 75 кг-дал къведалди заланвал авайбурун арада турнирда вири 4 бягьсни гъалибвилер къазанмишуналди акьалтIарна, ам инанмишвилелди 1-чкадиз лайихлу хьана.
РикIел хкин: адахъ гъалибвилер мадни ава. Ам Россиядин чемпионни, Дагъустандин, Россиядин ва махсус кубокрин сагьибни, международный акъажунрин ва турниррин гъалибчини я.
***
2-мартдиз Буйнакскдин райондин Буглен хуьре азаддаказ кьуршахар кьунай жаванрин (яшариз килигна категорийрай — 2007-2008, 2009-2010, 2011-2012-йисара дидедиз хьавайбурун) арада республикадин ачух турнир кьиле фена.
Саки 150-дав агакьна спортсменри иштиракай турнирда чи ватанэгьлийрини хъсан нетижаяр къазанмишна. Кьилди къуртIа, Вагьид Османова (45 кг-дин заланвал авайбурун арада) ва Агъаширин Агъаширинова (51 кг-дин заланвал авайбурун арада) — къизилдин, Максим Омарова (71 кг-дин заланвал авайбурун арада) ва Алимирза Абдулкъадирова (92 кг-дин заланвал авайбурун арада) гимишдин медалар къазанмишна.
Къейд авун лазим я хьи, спортдин кесерлу майданра агалкьунар вири 4 спортсмендихъ идалай виликни хьана.
***
И мукьвара Брянск шегьерда азаддаказ кьуршахар кьунай кьиле фейи Вирироссиядин турнирда чи ватанэгьли Агьмед Велиметова 65 кг-дин заланвал авайбурун арада гимишдин медаль къазанмишна.
РикIел хкин: СтIал Сулейманан райондин 2-нумрадин ДЮСШ-дин тренер Ибрагьим Царухаеван гъилик вердишвилер къачузвай А.Велиметов алай вахтунда Москвадин патай акъажунриз экъечIзава.
***
И йикъара Каспийскда кикбоксингдай кьиле фейи Дагъустандин чемпионатда республикадин шегьеррайни районрай тир 250-далай виниз жаванри чпин устадвал, алакьунар къалурна.
Къизгъиндаказ кьиле фейи бягьсерин нетижада СтIал Сулейманан райондай тир, 2-нумрадин ДЮСШ-да тренер Буба Бабаеван гъилик вердишвилер къачузвай Сулейман Къадиева ва Роберт Сердерова – 1, Амрид Эседова 2-чкаяр кьуна.
Рагнеда Рамалданова
