«Лезги газетдин» 18-январдин 2-нумрада чапнавай Тамила Хуршидовадин эсеррихъ галаз зун таниш хьана. Адан шиирар кIелайла, абур еке мана авай эсерар яз акуна заз. «Дустариз лагь» шиир кIелайла, зи вилик садлагьана Етим Эмин акъвазнавай хьиз хьана. И шиирда Тамилади кхьизва:
Чеб яргъарай хтай чIавуз Ватандиз,
Чун сад-садаз акурай лагь дустариз.
РикIин михьи теклифдалди мугьмандиз,
Зи вил гала, атурай лагь дустариз.
Дугъриданни, и шиирдиз яб гайи чIавуз лугьуз жеда хьи, Тамила ваха кхьенвай цIарар, рагьметлу Етим Эмина яратмишнавай «Шукураллагь, хъсан я лагь дустариз» цIарариз ухшар ава. Мадни Тамилади папарикай кхьенвай шиир гзаф акьуллу гафарин савкьат я чи халкьдиз.
Дулу хьайла хук-руфун,
ЧIехи дуст я телефон,
Чизмач хатур, я гьуьрмет,
Ашна хьанва интернет.
Са гафуналди, зун таниш хьана газетда чапнавай вири эсеррихъ галаз. Аллагьди Тамиладиз шаирвилин еке рехъ ачухнава. Къуй адаз мадни еке рекьер ачух хьурай гьа и вичи тухузвай рекьяй. Тамилади кхьизвай шиирар гзаф хушдиз, регьятдиз кIелиз жезва, абуру руьгьдиз екез таъсирзава, адан гьар са шиирдихъ дуьз мана-метлеб авайди малум жезва кIелзавай ксариз. Имни шаирдин чIалан устадвилихъ галаз алакъалу я. Гьаниз килигна, заз кIанзава Тамила вахаз еке агалкьунар хьун шииратдин рекье. За адаз нубатдин агалкьун мубаракзава ва милли эдебиятда къачунвай камар мадни мягькембур, къенибур, бегьембур хьун гуьзетзава. Къуй адахъ чандин сагъвал, хизанда хушбахтвал, цIийи шиирар майдандиз акъуддай къуват ва мумкинвал хьурай.
Зун я шаир туш, я тарихчи, анжах за Тамила вахаз жува кхьенвай са гъвечIи шиир бахшзава ва 8-Мартдин сувар мубаракзава:
Вун бахтлу хьун, чан Тамила,
Им чи халкьдин мурад я.
Мадни кхьихь, Тамила вах,
Вун чи халкьдиз савкьат я.
Вуна кхьизвай гьар са гаф
Ядигар яз аквада.
Тамила вах, бахтлу хьуй вун
Лезги халкьдин арада.
А.Агьмедагъаев
