Сулейманова Гуьлзада Ахцегь райондин Ялахърин хуьре дидедиз хьана. Вичин вири уьмуьр малдарвилин рекье эцигай Гьажидин 8 аялдикай Гуьлзада сад лагьайди тир. Вичелай гъвечIи вахарални стхайрал гуьзчивал авун, абурун къайгъудай фин югъди кIвалин крарал машгъул дидедихъ галаз чIехи рушани пайзавай. Гьа икI, гъвечIи чIавалай жавабдарвал гьисс авур, зегьметдин гьекьедин уьцIуь дад сиве гьатай рушан гележегдин вири уьмуьр кIвалахдиз, пешедиз вафалу яз давам хьана.

Дагъвийрин аялриз адет тирвал, Гуьл­задади хуьре авай 8 классдин мектеб акьалтIарна. Дагъдин хуьре чIехи хизандиз тухдалди фу гун регьят кар тушир­. Гьаниз килигна, кIвачи чил кьунвай  Гуьлзада Дербентда яшамиш жезвай, кафеда ашпазвиле кIвалахзавай халадин кьилив ракъурун хъсан меслят яз акуна, бубадини дидеди руш, чпиз чидай кьве акьулни гана, рекье туна. Халадиз рушакай вижевай куьмекчи хьана.

Гьа икI, шегьердин уьмуьрдихъ галаз­ вердиш хьайи Гуьлзададиз, элкъвена­ дагълух хуьруьз хъфена, маларихъ гел­къвез, хьра фу чраз, фитедикай гилигар гьазуриз кIан хъхьанач. 18 йисавай жегьил руш Махачкъаладавай муькуь халадин кьилив атана, эцигунардай «Горремстрой» идарада ширчивилин пеше кьуна, кIвалахиз башламишна. Махачкъалада къенин йикъалди вичин хизан галаз яшамиш жезва.

Ина Гуьлзада гъуьлуьз фена, пуд аялдин — са рушанни кьве гададин диде хьана. Амма­ кIвалин иеси анжах дишегьлидин везифаяр тамамарунал акъвазнач. Вичи­ лугьудайвал, ам кIвалах тавуна кьарай къве­­дайбурукай туш. Олег Кошевоян тIвар­­цIихъ галай куьчеда Гуьлзада яшамиш жезвай вад мертебадин кIвалера «Мавел» чапхана ачухайла, кьарайсуз дишегьли гьана ктабар кIватIдай пешекар яз кIвалахдив гатIунна.

ГъвечIи чIавалай рикIин азар авайвиляй кIвалевай итимдини гадади адаз кIва­лахал фин къадагъа ийизвай, амма абурувай Гуьлзададин гъил кьаз хьанач. Исятда 15 йис жезва адакай ктаб­рин устад хьана. ИкI лугьунихъ ихьтин себеб ава: чапханадай акъатзавай гьар са ктаб адан жавабдар ва галатун тийижир гъилерин нетижа я — ктабриз цвалар­ авун, клей ягъун, жилдер гьазурун­ ва галкIурун, прессдалди кIа­лубдиз гъун. Ибур неинки гъилералди, гьакI станокрихъ ацукьайлани ийизвай гьерекатар я. КIелдайбуруз чир хьун герек я «Мавел» чапханадай акъат­завай вири ктабрин «ар­хитектор» Сулейманова Гуьлзада тирди.

— Гуьлзада Гьажиевна­диз вичин пеше акьван хъсандиз чизва хьи, адаз алава гьич са гафни тикрарун герек къведач, — лугьузва чапханадин директор Мегьамед Магьмудова. — Адан кIвалахдин къайда, ери лап вини дережадинбур я, харжзавай вахт — тIимилди. Ам себеб хьана, юкьван гьисабдалди муькуь ктабар гьазурзавай идарайрилай чна гьар са ктабдал харж ийизвай вахт, еридиз зиян авачиз, са кьадар тIимилди жезва. Гьавиляй ктабрин авторар чалай рази яз амукьзава. Зун адан пешекарвилелайни инсанвилелай гзаф рази я.

— Валлагь, Гуьлзада хала чи идарадин жигер я, — алава хъийизва чапханадин­ кьи­лин пешекар Арсен Велиева. — Ам ава­чирла, чаз нефес тIимил жедай хьиз я.

— За жув бахтлу кас яз гьиссзава, — лу­гьузва Гуьлзада Гьажиевнади, — вучиз­ лагьайтIа, захъ кьве хизан ава: сад — кIва­ле, садни — кIвалахал. Бязи вахтара,  яшариз килигна, четин жезватIани, заз кIвалах авачиз, кьарай къведач, акI жеда хьи, гуя зун тахьайтIа, идарадин кIвалах акъвазда, — хъуьрезва ам.

Чун паталди алахъзавай пешекаррин арада Гуьлзада Гьажиевна хьтин зегьметдал рикI алай, жавабдарвал гьиссзавай, вичи кIвалахзавай коллективдин къимет-гьуьрмет хуьзвай ва хкажзавай инсанар хьунал ктабар кIелзавайбурни шад я.

ООО «Мавел» чапханадин коллективди Гуьлзада Гьажиевнадиз 8-Мартдин шад сувар рикIин сидкьидай мубаракзава, адахъ чандин сагъвал, хизанда хушбахтвал хьун Аллагьдивай тIалабзава.

«Лезги газетдин» редакциядин коллективдини и гафарал къул чIугвазва.

Максим Алимов