20-февралдиз Дербент шегьерда­, Лезгийрин СтIал Сулейманан тIвар­цIихъ галай госмуздрамтеатрда мер­­гьяматлувилин «Возрождение Дербента» фондунин куьмекдалди шегьердин мектебра кIелзавай аялрин арада XX асирдин Гомер СтIал Сулейманан эсерар хъсандиз кIелунай тешкилнавай конкурс кьиле фена.

СтIал Сулейман дидедиз хьайидалай инихъ 155 йис тамам хьуниз талукьарнавай мярекат, иштиракчийрихъ­ агалкьунар хьун алхиш авуналди, Лезги театрдин директор, жюридин председатель Динара Эминовади ачухна­. Фондунин крар идара ийизвай директор, шаир ва алим Азиз Мирзебегова кIватI хьанвайбур конкурсдин шартIарихъ галаз танишарна.

Конкурс, сифтегьан ва чIехи классра кIелзавай аялар кьве дестедиз пайна, кьиле тухвана. Иштиракчийрин кьадар 30-дав агакьнавай.

Жюридик квайбурун арада Лезги те­атрдин директор Динара Эминова — председатель, театрдин кьилин режиссер, РД-дин лайихлу артист Казбек Думаев, РД-дин искусствойрин лайихлу деятель, композитор, «Лезги газетдин» хсуси мухбир Къагьриман Ибрагьимов, Дербентдин педколледждинни Белиждин гим­назиядин лезги чIаланни литературадин муаллимар тир Рагнета Алибего­ва ва шаир Гъулангерек Ибрагьимова авай.

Нетижада сифтегьан классрин дес­­­тедай 1-чкадиз Фарид Къурбанов­  (СОШ №13, 2-кл., муаллим В.Кьасу­­мо­ва), 2-чкадиз Мегьамед Азизов (СОШ №11, 2-кл., муаллим Н.Ба­баева) ва 3-чкадиз Азиза Гьасанова­ (гимназия КМ, 3-кл., муаллим А.Уружева) ла­йихлу хьана. ЧIехи классрин дестедай 1-чка Муьгьуьдин Гьасанова (гимназия КМ, 7-кл., муаллим Т.Магьмудова) 2-чкаяр Рейгьан Семедовади (гимна­зия КМ, 7-кл., муаллим Г.Адаева) ва Зульминат Къазиагьмедовади (2-нум­­радин гимназия 5-кл., муаллим­ А.Магь­мудова), 3-чкаяр Имам Къурбанова (СОШ № 13, 8-кл., муаллим Л.Савзиева) ва Амина Сеидовади (СОШ №15, 11-кл., муаллим Р. Алиева) кьуна.

КIвенкIвечи чкайриз лайихлу хьайи аялривни абурун муаллимрив гьар садав 1-чкадай -10, 2-чкадай — 7 ва 3-чкадай 5 агъзур манатдин кьадарда аваз пулдин пишкешар вахкана.

Чкаяр тахьай аялрик, гьар садаз агъзур манат гуналди, гьевес кутуна. Муаллимрин зегьмет сертификатар гуналди къейдна.

Къагьриман  Ибрагьимов