20-февралдиз ДГПУ-дин Дагъустандин филологиядин факультетда ДГУ-да ва ДГПУ-да лезги чIал чирзавай студентрин арада лезги публицистикадай «Лезги прессадин цIирер» кьвед лагьай конкурс кьиле фена. Мярекатдин тешкилатчийрин арада Алкьвадар Гьасанан тIварцIихъ галай медениятдинни марифатдин центр, лезгийрин милли медениятдин федеральный дережадин автономия (ФЛНКА) ва «Лезги газетдин» редакция авай.
Къейд ийин хьи, конкурсдин асул макьсад лезги чIал чирзавай студентрин арадай публицистикадин рекьяй алакьунар авайбур винел акъудун ва абур лезги чIалал акъатзавай изданийрин редакцийриз кIвалахал желб авун я.
ЦIи конкурсда 27 студентди иштиракна. Абуруз лезги публицистикадай тестар, туькIуьр хъувун патал (редактировать) текст ва куьруь макъала кхьин патал тайин тема ганвай. КIвалахриз къимет гайидалай кьулухъ лезги студентрихъ публицистикадай гьихьтин чирвилер аватIа, абуруз хайи чIал гьихьтин дережада чизватIа тайин хьана. Конкурсда иштиракай студентрикай гележегда лезги, урус чIаларин ва сифтегьан классрин муаллимар жеда. Амма, гьайиф хьи, абурун чIехи паюниз «Лезги газет» шумуд чиникай ибарат ятIа, лезги чIалал аялар патал акъатзавай журналдин тIвар, Гьажибег Гьажибегов вуж кас тиртIа чизвачир. И делилди абуру лезги пресса кIел тийизвайдан гьакъиндай шагьидвалзава. Чи фикирдалди, амайбуру кIел тавуртIани, чпин уьмуьр чIалан муаллимдин пешедихъ галаз алакъалу авунвайбуру хайи чIалал акъатзавай изданияр кIелун чарасуз я.
Гъалибчияр хкядайла, асул фикир текст туькIуьр хъувунвай ва макъала кхьенвай къайдайриз ганвай. ИкI, нетижада 1-чкадиз ДГУ-дин 3-курсунин студентка Диана Бабаева (диплом, 30 агъзур манат), 2-чкадиз ДГПУ-дин 2-курсунин студент Мурадали Улубегов (диплом, 20 агъзур манат), 3-чкадизни пуд кас — ДГПУ-дин 3-курсунин студентка Милена Агьмедова, ДГПУ-дин 4-курсунин студентка Назиля Магьмудинова ва ДГУ-дин 3-курсунин студентка Зурият Аразова (гьар садаз — дипломарни 10 агъзур манатдин кьадарда аваз пулдин пишкешар) лайихлу хьана. Абуруз гьакIни Мансур Куьревидин «Етим Эмин. ЦIувай куз тахьай цIарар» ктабарни гана.
Къейд ийин хьи, конкурсда кIвенкIвечи чкаяр кьур студентрихъ галаз «Лезги газетдин» редакцияди алакъаяр хуьда, абуруз жуьреба-жуьре тапшуругъар гуда. Милли прессада кIвалахиз абуруз хуш жедайдак чна умуд кутазва.
Агьмед Магьмудов
