И йикъара Каспийскда, Али Алиеван тIварунихъ галай спортдин ва жегьилрин имаратда, азаддаказ кьуршахар кьунай Олимпиададин чемпион Загалав Абдулбегован призар патал Дагъустандин чемпионат кьиле фена. Заланвилин 10 категориядай ана 230 спортсменди гьасиррал чпин устадвал къалурна.
Чи ватанэгьлийрикай ана Рамазан Ферзалиева 65 кг-дин заланвал авайбурун арада гимишдин медаль къазанмишна. Гъалиб хьайи амайбурухъ галаз адани алай вацран эхирра Нальчик шегьерда кьиле фидай СКФО-дин чемпионатдиз гьазурвал аквазва.
РикIел хкин: чпин бубайрин ери-бине Ахцегь райондин КIурукIнарин хуьряй тир Р.Ферзалиев (и хуьруьн агьалийрин са пай алатай асирдин 50-йисара Хасавюрт райондин Къурушдал, муькуь пайни Къурукалар ва Бамматюрт хуьрериз куьч хьана) 1995-йисан 19-февралдиз Бамматюртда дидедиз хьана. Ам международный ва Вирироссиядин хейлин турниррин, континентрин уртах Кубок патал акъажунрин гъалибчи ва призёр я. Ада Дагъустандин жаванрин арада чемпионвилин тIварни къазанмишна, адакай Россиядин Кубок патал акъажунра виридалайни хъсан спортсменни хьана.
«Лезги газет»
