Чи халкьдин чIехи шаир Етим Эмин тийижир кас лезги чилел бажагьат ала. Адан шиирар кIелдайла, зи бедендиз хар акъатда. Гьакьван хуш я заз адан эсерар. Адан саки вири ктабар за жагъурнава. Бязи эсерар, масанрай жагъурнавай ктабрай чарарал ахкъудна, жуван ктабханада хуьзва.
Мукьвара за мектебда заз тарсар гайи чи хуьруьнви, гьуьрметлу Гьасамудин муаллимдивай Етим Эминан шикил чIугун тIалабна. Са шумуд йикъалай ада заз шаирдин шикил гьазур хьанвайдакай хабар гана. Исятда за а чIехи шикил жуван кIвалин цлакай куьрсарнава. Эмин хьтин бажарагълу ксар тек-туьк жезвайди я. Адан эсерри зи руьгь хкажзава. Мукьвара зун Эминан сурал фена, дуьаяр кIелна.
Нефесди тади гуз, завай рахаз тежез гзаф йисар я. Зун мадни шииратдал гзаф ашукьарун патал за Аллагьдиз ялварзава. Вирида хьиз, зани юкьван мектеб куьтягьна. Гуьгъуьнлай зун муздестедик экечIна, манияр лагьана. Мехъеррик физ, жуван кьил хвена. Са кьадар чIавалай за базарда бегьлеяр маса гудай туьквенда кIвалахна. Азарди вичикай хабар гуз гатIунайдалай кьулухъ кIвалахдиз къабил яз амукьнач. Гила кIелунал, кхьинар авунал машгъул я зун. Амма инсанрин юкьва жез, ихтилатар ийиз кIанда заз.
Мукьвара зун сифте сеферда яз «Лезги газетдин» редакциядиз мугьман хьана. Ирид лагьай мертебадиз хкаж хьайила, кьилин редактор Мегьамед Ибрагьимовани адан заместитель Куругъли Ферзалиева зун хушдиз кьабулна. Редакцияда авай музейдихъ, ктабханадихъ, къуллугъчийрихъ галаз таниш хьана. Агалкьунар хьурай чи редакциядин коллективдихъ!
Лезги Рустам,
ЦIийи Къуруш
