Шадвилин межлис
Алатай гьафтедин жуьмя юкъуз СтIал Сулейманан райондин культурадин кIвале, бажарагълу писатель ва шаир Сардар Абилан (Межидован) 65 йисан юбилейдиз талукьарна муниципалитетдин администрацияди тешкилна, чIехи межлис кьиле фена.
И мярекатда иштиракай райондин кьилин заместитель Лацис Оружева, райондин депутатрин собранидин регьбер Штибег Мегьамедханова, Дагъустандин халкьдин шаир Майрудин Бабаханова, Дагъустандин писателрин Союздин секретарь Максим Алимова, машгьур шаир, журналист Мердали Жалилова чпин рахунра юбилярдиз тебрикдин чими келимаяр лагьана.
Залда кIватI хьанвай Сардар Абилан хуьруьнвийри ва Кьасумхуьруьн агьалийри мярекат гзаф хушвилелди кьабулна, чпин фикирар лагьана.
Кьасумхуьруьн телевиденидин къуллугъчи Музамидин Магьмудова, Дагъустандин лайихлу муаллим Абдул Ашурагъаева Сардар Абилан уьмуьрдикай ва яратмишунрикай гегьенш малуматар гана. Лезги чIалан муаллим Сегьерханум Османовади гьазурнавай аялрин дестеди юбилярдин шиирар гзаф эсерлудаказ кIелна.
Межлисдин эхирдай Сардар Абила вичин юбилей къаршиламишиз атанвайбуруз ктабар пайна.
Чи мухбир
