26 проект хкянава
Уьлкведин хуьруьн майишатдин министерстводи Дагъустанда культуртехнический серенжемар кьиле тухуниз талукь 26 проект хкянава. Идакай РД-дин хуьруьн майишатдин ва недай суьрсетдин министерстводин телеграм-каналди хабар гузва.
Чешмеди кхьизвайвал, винидихъ къейднавай мярекатар кьиле тухудай майданрин кьадар 4 агъзур гектардилай гзаф мулкуникай ибарат жеда. Ведомстводин делилралди, эхиримжи 5 йисан къене республикада хуьруьн майишатда ишлемишун патал 27 агъзур гектар чилер кардик кутунва. Идакай хейлин майданар культуртехнический серенжемар кьиле тухуналди желбнава. ИкI, 2019-2023-йисара уьмуьрдиз кечирмишнавай 170-далай виниз проектрин сергьятра аваз, 17 агъзур гектардилай гзаф майдандал чил хуьруьн майишатда ишлемишун патал гьазуруниз талукь серенжемар кьиле тухванва.
Майданар артухарда
2024-йисуз Дагъустанда картуфар, салан майваяр, хали-къарпуз (бахчевые культуры) цадай майданар артухарда. Идакай, РД-дин хуьруьн майишатдин ва недай суьрсетдин министр Мухтарбий Аджекован гафарал асаслу яз, ведомстводин телеграм-каналди хабар гузва.
Министрди къейд авурвал, Дагъустанда алай йисуз, санлай къачурла, цадай чилерин кьадар 373 агъзур гектардиз барабар жеда. 2024-йисан бегьер патал 90 агъзур гектарда зулун магьсулар цанва. Гатфарин тумар лагьайтIа, 233 агъзур гектардикай ибарат майданрал цун фикирда кьунва.
Чиновникдин гафаралди, гьа са вахтунда, шаз хали-къарпуз 6,9 агъзур гектардин майданра цанвайтIа, алай йисуз и рекъем 8,2 агъзур гектардив агакьна артух жеда.
ГьакIни къейдзавайвал, 2023-йисуз салан майваяр 41,1 агъзур гектарда цанвай. ЦIи и мулкарин кьадар 41,8 агъзур гектардал кьван артух жеда. Картуфрикай рахайтIа, шаз абур 19,1 агъзур гектардин майданра цанвайтIа, цIи и рекъемни 19,5 агъзур гектардив агакьна артух жеда.
Мухтарбий Аджекова мадни алава хъувурвал, гатфарихъ чуьлда кIвалахар кьиле тухунал 3,2 агъзур уьлчмедилай виниз чил гьялдай, тумар цадай техника ва миянардай затIар вегьедай машинар желбнава.
Зирзибилдикай азадна
Хасавюрт, Каспийск, Буйнакск ва Кьиблепатан Сухокумск шегьерра ихтияр авачиз зирзибил гадардай кьуд чка михьи авун кьилиз акъудна. Идакай Дагъустандин премьер-министр Абдулмуслим Абдулмуслимова ихтилатна.
Ада къейдзавайвал, «Михьи уьлкве» проектдин сергьятра аваз кьиле тухванвай и серенжемдиз, уьлкведин тIебиатдин ресурсрин ва экологиядин министерстводихъ галаз икьрар хьуналди, 1 миллиард манатдилай виниз такьатар харжнава.
Кьилди къачуртIа, «Дагъустандин экономика» телеграм-каналди, РД-дин тIебиатдин ресурсрин ва экологиядин министерстводал асаслу яз, кхьизвайвал, винидихъ ихтилат физвай чкаяр зирзибилдикай михьи авун патал кьилин такьатар федеральный бюджетдай ракъурна (960 миллион манат). Республикадин бюджетдай лагьайтIа, и макьсадар патал генани 50 миллион манат алава хъувуна.
Хабар гузвайвал, и серенжем кьилиз акъудуналди, 227 агъзур дагъустанвидин яшайишдин ери хъсанариз алакьна, гьикI хьи, гила 35 гектардикай ибарат мулкар зирзибилдикай, пис ниэрикай азад хьанва.
А.Абдулмуслимован гафаралди, азад хъувунвай чилер февралдин эхирралди шегьеррив вахкун пландик кутунва. Чешмеди гъизвай делилралди, майишатдин кIвалахдал желб хъийидай майданрин кьадар, санлай къачурла, 35,4 гектардиз барабар я.
Дегишвал хьанва
Алай йисан январдин нетижайралди, Дагъустанда инфляциядин кьадар 1,2 процентдиз барабар хьанва. «Дагестанстатдин» делилар «Дагъустандин экономика» телеграм-каналди раижнава.
Кьилди къачуртIа, республикада сезондинбур тушир емишринни салан майвайрин къиметар юкьван гьисабдалди 4 процентдин, некIедин суьрсетдин лагьайтIа, саки 2 процентдин хкаж хьанва.
Гьа са вахтунда йисан сад лагьай вацра вечрен какайрин къимет агъуз аватнавайди тайинарнава. ИкI, юкьван гьисабдалди 10 какадикай ибарат лоток 135-140 манатдай маса гузва.
ГьакIни къейдзавайвал, РД-да алатай вацра гзафни-гзаф къиметар хкаж хьанвай недай суьрсетар тушир метягьрин арада электробытовой ва яшайишдиз талукь маса такьатар (1,6 процент), дарманар (1,3 процент) ва парчаяр (1,02 процент) ава.
Гьазурайди — Муса Агьмедов
