Керимов Мурад 1967-йисан 2-январдиз Дербент райондин Белиж поселокда дидедиз хьана. Адан ери-бине Хивдай я. Юкьван школа хъсан чирвилер ва тербия аваз куьтягьай жегьилди 1985-1987-йисара Яракьлу Къуватрин жергейра ВДВ-да къуллугъна.
Армиядай хтай викIегь спортсмен 1987-йисуз Кишиневдин госпединститутдин спортдин ва физкультурадин факультетдик экечIна. Зегьметдин рехъ жегьилди Кишинев шегьердин «Спартак» клубда-школада тренер-муаллим яз башламишна.
1992-йисуз ватандиз хтай ада Белиж поселокдин 8-нумрадин ПТУ-да, гуьгъуьнлай ЦIийи Фригърин юкьван школада физкультурадин муаллим яз кIвалахна.
ПТУ-да ва юкьван школада кIвалахзавай вахтунда ада аялриз, хуьруьн акьалтзавай жегьилриз спортдин ва физкультурадин рекьяй чирвилер гана, спортдин секцияр ачухна, жаванрихъ галаз кIвалахна. Нетижада муаллим-тренер Мурад Севзихановича вердишарай аялри, жегьилри райондин, республикадин олимпиадайра гъалибвилер къачуна ва чпикайни хъсан спортсменар-тренерар хьана.
2005-2014-йисара ада Дербентдин къушчивилин фабрикада директордин заместитель, Араблинкадин МУП-дин агроном-бригадир яз зегьмет чIугуна. Идалай кьулухъ хуьруьз хтай Мурадакай ЦIийи Фригърин аялрин «Чубарук» бахчадин заведующий хьана.
Регьбервал гузвай еке коллективда адаз гьуьрмет ава. Къейд ийин, аялрин бахчада кIвалахзавай тербиячийри, муаллимри аялриз хъсан чирвилер, тербия гузва. Аялрин диде-бубаяр и коллективдилай гзаф рази я.
КIвалахдивай къерех тахьана, М.Керимова Москвадин СГА (Современная гуманитарная академия) куьтягьна. Виниз тир дережадин муаллим, тренер, юрист, программистни яз, ам общественный кIвалахрални машгъул жезва. 2011-йисалай Мурад Керимов Кьиблепатан Дагъустандин ВДВ-дин ветеранрин советдин председатель, 2012-йисалай Дербентдин ришветбазвилихъ галаз женг чIугвадай комиссиядин отделдин начальник, 2015-йисалай Хив райондин МО-дин райсобранидин депутат я. Инсанперес, ватанперес Керимов Мурад гьукуматдин цIудав агакьна пишкешрин ва шабагьрин сагьиб я.
Рамазан Велибегов
