Муаллимвал амай вири пешей­рин бине я лугьузва. Эминова­ Радмила Абидиновнадихъ и пе­ше­ хкядай мурад гьеле мектебда кIел­дай йисара авай. Ам 1977-йисан 1-октябр­диз СтIал Сулейманан райондин СтIалрин хуьре дидедиз хьана. 1994-йисуз Дербентдин педколледждик экечIна, пуд йисалай ам акьалтIарна, Вини СтIалрин школада  лезги чIаланни литературадин муаллимвиле кIвалахал акъвазна.

РикI алай пешедин сагьиб хьайи Радмила, дерин чирвилер авай хъсан пешекар яз, аялриз хайи чIа­­лан тарсар гунив ашкъидивди эгечIна. Ада школадин общественный уьмуьрда  активнидаказ иштиракзава. Радмила Абидиновнади тарс гузвай аялри районда тухузвай викторинайра, хайи чIалаз талукьарна тешкилзавай конкурсра хъсан чкаяр кьазва. Ам вичин везифайрив мукьуфдивди эгечIзава. Ачух тарсара лезги халкьдин  кьегьалрикай, игит­рикай суьгьбетзава, литературадин ирсинихъ га­­лаз танишариз, аялрин чпин фикирар ахтармишзава. ЧIалал рикI хьунин, дидедиз, Ватандиз вафалувал хуьнин месэлаяр мукьвал-мукьвал къарагъарзава.

Радмила Абидиновнадихъ мектебда кIвалахунин 27 йисан тежриба хьанва.  И мукьвара Вини СтIалрин школада йисан хъсан муаллим хкядай конкурс кьиле тухвана. Ина чи райондин 7 муаллимди иштиракна. Абуру чпин устадвал, кьатIунар, пешедин метлеблувал къалурна. Нети­жада 3-чка — Испикрин ва Цмуррин,  2-чка ЦIийи Макьарин школайри кьуна. 1-чкадиз Радмила Эминова лайих­лу хьана. Райондин образованидин управленидин начальник­ Гьуьсейн Шихбабаева и мярекатда  иштиракай муаллимриз агалкьунар тебрикна, пишкешарни дипломар гана. Радмила Абидиновнадиз конкурс­да гъалиб хьун чнани мубаракзава.  Чаз чи муаллимдихъ  мадни еке агалкьунар хьун кIанзава.

Замир  Мегьамедов,

Вини СтIал