СтIал Сулейманан районда АПК вилик финиз инвестицийрин чIехи проектар уьмуьрдиз кечирмишуни екедаказ куьмек гузва. Хуьруьн майишатдин вилик фенвай хилерикай яз, багъманчивални уьзуьмчивал къалуриз жеда. Районда 2021-2025-йисара багъманчивал ва уьзуьмчивал вилик тухунин план туькIуьрнава ва уьмуьрдиз кечирмишзава.
Уьзуьмчивилел акъвазин. Алай вахтунда уьзуьмчивилел машгъул тир хуьруьн майишатдин карханайри, лежбервилинни фермервилин майишатри ва арендаторри уьзуьмлухра хъуьтIуьн кIвалахар кьиле тухузва.
— Уьзуьмчивиликай рахадайла, къейд ийиз кIанзава хьи, районда алатай йисуз 17300 тонн ципицIар кIватI хъувуна, гектардин бегьерлувили 102 центнер тешкилна, — лугьузва райондин хуьруьн майишатдин ва суьрсетдин управленидин начальникдин заместитель Къазиагьмед Абумуслимова. — Лежбервилинни фермервилин кьилдин майишатри ва арендаторри гьар са гектардай 120-130 центнер бегьер вахчуна.
Алай вахтунда уьзуьмлухра тегьенгрин кьурай ва герек авачир хилер атIунин кIвалахар кьиле тухузва. Хуьруьн майишатдин карханайрихъ, КФХ-рихъ ва арендаторрихъ, санлай къачурла, 2073 гектар уьзуьмлухар ава.
— Тегьенгрин кьуранвай ва герек авачир хилер неинки вахтунда, гьакIни дуьз къайдада атIунихъ еке метлеб ава, — лугьузва Эминхуьряй тир арендатор, Дагъустан Республикадин хуьруьн майишатдин лайихлу работник Алимирзе Агъамирзоева. — Мисал яз, гъавурда авай пешекарди кьурай ва герек авачир хилер атIай уьзуьмлухрин гьар са гектарди 100-120 центнер бегьер гузватIа, гъавурда авачир касди и серенжем кьиле тухвай участокди 50 центнерни тагун мумкин я.
Уьзуьмлухра тегьенгрин кьурай ва герек авачир хилер атIунин кIвалахар инвестицийрин проектрай тешкилнавай карханайра, Ф.Садикьовадин, А.Алагьвердиеван, М.Мегьамедован, А.Агъамирзоеван, Н.Ягьяеван, О.Абдулаеван ва маса КФХ-рани арендадин участокра хъсан тешкиллувал аваз кьиле физва. 1000 гектардилай виниз уьзуьмлухра и кар кьилиз акъудна.
ЦIинин кьуьд живер авачирди хьанва. Ида карханайриз, лежбервилинни фермервилин майишатриз ва арендаторриз уьзуьмлухра агротехникадин серенжемар галай-галайвал ва чпин вахтара кьиле тухудай мумкинвал гузва.
ЦIи 17500 тонндилай тIимил тушиз ракъинин кагьрабаяр кIватI хъувун планламишнава.
Хазран Кьасумов
