Мартдилай Россияда «Бизнес онлайн-къайдада башламишун» къуллугъди кIвалах башламишда. Идакай федеральный налогрин къуллугъди хабар гузва. Ихьтин къуллугъди агьалидиз, налогрин идарадиз фин тавуна, хсуси кар гъиле кьадай мумкинвал гуда. Хсуси бизнес ачухунин вири кIвалахар гила биометриядин куьмекдалди тамамариз жеда.
Къуллугъди бизнес регистрация ийидай, арада мензил аваз банкара счет ачухдай ва са жерге маса крар кьилиз акъуддай мумкинвал гуда.
«Алишверишдин ва государстводин къуллугърикай менфят къачунин карда им къулайвилин цIийи дережа я. Ада агьалидиз месэла лап куьруь вахтунда ва тамамдаказ гьялдай мумкинвал гуда», — баян гузва Гьукуматдин Председателдин заместитель — РФ-дин Гьукуматдин Аппаратдин кьил Дмитрий Григоренкоди. ЦIийи къуллугъ 2025-йисан 1-мартдалди давам жеда. Ида онлайн-къуллугъ кьилдин ксар ва карханаяр патал менфятлу жедани, жедачни чирдай, гьакIни бизнес онлайн-къайдада башламишун ва виликди тухун патал лазим тир государстводин ва алишверишдин къуллугъар тайинардай мумкинвал гуда.
«Лезги газет»
