2023-йисуз Дагъустан Республикади банкарай 144 миллиард манатдин кредитар къачуна. Им 2022-йисуз къачурдалай 1,6 сеферда артух кьадар я, хабар гузва Россиядин Банкунин Дагъустанда авай Отделенидин — Милли Банкунин пресс-къуллугъди. Агьалийри гзаф къачунвайбурук гьам муьштеривилин (яни и ва я маса шей маса къачуз) гьамни ипотека патал гузвай кредитар ква.
ИкI, алатай йисуз дагъустанвийри 987,4 миллиард манатдин кьадарда аваз (2022-йисан кьадардилай 1,6 сеферда гзаф) муьштеривилин кредитар къачунва. Яшайишдин кIвалер маса къачун патал банкари ганвай пулунин кьадар, идалай вилик йисан делилрив гекъигайла, 1,7 сеферда гзаф хьанва ва 45,8 миллиард манат тешкилзава. Пешекарри гьисабзавайвал, и кардин себеб ам я хьи, республикадин агьалияр базардин ставка ва кьезилвилер авай госпрограммайрай сифтегьан взносдин кьадар хкаж жедалди кредитар къачуз алахъзавай. 1-январдилай адан кьадар кредитдин кьадардин 30 процентдилай тIимил тушиз тайинарнава.
Банкарин муьштерийрин желбнавай такьатрин кьадар, 2024-йисан 1-январдин делилралди, тахминан 180 миллиард манатдиз барабар тир, са йисан вахтунда абур 18,5 процентдин гзаф хьана. Банкари желбзавай пуларин чешмеяр, виликдай хьиз, инсанри кIватIнавай пулар яз ама — абуру санлай къачур кьадардин тахминан 75 процент тешкилзава. 1-январдин делилралди, Дагъустандин агьалийри банкарин счетра кIватIнавай пуларин кьадар 134 миллиард манатдиз барабар я (шазандалай 21 процентдин гзаф).
«Лезги газет»
