Квез чидани?
. РагъэкъечIдай патан Африкадин гъвечIи уьлкве тир Джибутидин умуми майдан 23200 квадратный километрдикай ибарат я.
. Уьлкведа 976 агъзурдалай виниз агьалияр яшамиш жезва.
. Джибутида араб ва френг чIалар кьилинбур я.
. И уьлкве Яру гьуьлуьн ва Индиядин океандин сергьятдал ацалтзава.
. Са девирда и уьлкве Франциядин колония тир.
. ХХ асирдин юкьвара адал «Франциядин Сомали» тIвар алай.
. И уьлкведин меркездин тIварни Джибути я.
. Джибутидин умуми майдандикай 90 процент къумлухри кьунва. Гьа са вахтунда набататрин ва гьайванрин алемни девлетлуди я.
. Уьлкведин кеферпата Форе дю Дэй тIвар алай милли парк ава. Ана инжилдин, рипераг (можжевельник), пальмадин тарар экъечIзава.
. Уьлкведин агьалияр кьве халкьдикай ибарат я: афар ва исса.
. Афарар Эфиопияда, Джибутида ва Эритреяда авай кушитрикай я.
. Джибутидин чIехи пай агьалияр исса халкьдикай я. Ам Сомалидин дир тайифадик акатзава.
. И уьлкведа жуьреба-жуьре миргер, маймунар, гепардар, гзаф кьадар къушар яшамиш жезва.
. Джибути дуьньядин лап кьурагь уьлквейрин жергеда ава.
. Ина авай вири вацIар чими вахтунда кьуразва.
. Ана Африкадин сергьятра авай тек сад тир США-дин Кэмп Лемоннье военный база ава. И базада 4 агъзурдалай тIимил тушиз датIана аскерар жезва.
. Джибутида неинки США-дин, гьакI Китайдин, Франциядин военный базаярни ава.
. Джибути бейкарвал вини дережада авай уьлкве я.
. Ана арадал гъизвай суьрсетдин вадан кьуд пай маса гун патал Сомалидиз ракъурзава.
. Уьлкведа сиясатдин партияр къадалайни гзаф ава. Ана сиясатдин гьалар са акьван пайгар тахьунин себебни гьа идахъ галаз алакъалу яз гьисабзава.
. Джибутидин агьалийрикай пудан са паюниз кIелиз-кхьиз чизвач.
. Уьлкведин умуми къазанжидикай 3 % хуьруьн майишатдал ацалтзава.
. Государстводин милли пул Джибутидин франк я.
. Джибутидин конституцияда Ислам дин государстводинди яз къалурнава. Гьа са вахтунда конституцияди гьар са ватандашдиз вичи хкягъай диндал амал ийидай азадвални гузва.
«Лезги газет»
