Гьакъи агакьарнач лугьуз
Полициядин къуллугъчийри СтIал Сулейманан районда инсан кьинихъ галаз алакъалу тахсиркарвал авунай шак физвай жегьил тайинарнава. Райондин полициядин дежурный частунив Алкьвадрин хуьре, кьве итимдин арада къалмакъал хьуникди, сада муькуьди чукIулдалди ягъайвиликай хабар агакьна. ЧукIул галукьай 52 йисан яшда авай итим агьвалат кьиле фейи чкадал куьтягь хьана.
Полицейскияр тади гьалда чкадал фена. Шак физвайди кьуна ва отделдиз хкана. Ам 26 йисан яшда авай и районэгьли я. Вичи авур кар ада хиве кьунва.
Малум хьайивал, абуру кьведани санал ремонтдин кIвалахар кьилиз акъудна. Нубатдин объектдал кIвалахар акьалтIарайдалай кьулухъ 52 йисан яшда авай агьалиди 26 йисан яшда авай агьалидив адаз къвезвай гьакъи вахканач, ада са кIус геж вахкун хиве кьуна. Гуьгъуьнлай ички квай затIар хъвазвай вахтунда жегьил итимди вичин гьакъи истемишна. Абурун арада къалмакъал хьана. Жегьилди чукIул къачуна ва вичиз буржлуди са шумудра адавди яна.
И делилдай полицейскийри кIватIнавай материал силис тухун патал ракъурнава.
«Лезги газет»
