Гьахъ-гьисаб хъувун теклифнава

РД-дин Кьилин ва Гьукуматдин Администрациядин руководителдин заместитель Рашид Акавова къейдзавайвал, дагъустанвияр ЖКХ-дин къуллугърикай менфят къачунай абуру авунвай харжийрин жигьетдай гьахъ-гьисаб (перерасчет) хъийидай мумкинвал авайдакай хабардар авунин кIвалах гужлу авун лазим я. Идакай «Дагъустан» РИА-ди хабар гузва.

ИкI, Р.Акавова мукьвара Махачкъалада кьиле фейи Оперштабдин заседанидал хабар гайивал, ЦУР-ди (Центр управления регионом) ихьтин серенжем кьиле тухун теклифнава: гьахъ-гьисаб чпикай менфят къачунай пул счетчикрин рекъемрал бинеламиш тахьана гузвай, жуьреба-жуьре себебралди мукьвал-мукьвал хкатзавай ЖКХ-дин къуллугърин гьакъиндай хъийин. Чешмеди кхьизвайвал, и месэла виликамаз Дагъустандин ГЖИ-дихъ (Госжилинспекция) галаз веревирд­нава.

Р.Акавован гафаралди, и месэладин гьакъиндай тешкилдай кIвалахрал гуьзчивал тухун ГЖИ-дал ихтибарун теклифнава. ГьакIни и кардал Махачкъаладин администрацияни желб авуртIа, жеда. Агьалияр ихтилат физвай месэладин жигьетдай гъавурдик кутун патал кьиле тухудай мярекатра региондин ва муниципалитетрин жемиятдин уьмуьрда активнидаказ иштиракзавай векилризни теклифунихъ метлеб ава.

Мадни Р.Акавова ЖКХ-дин къуллугъар кардикай хкатай дуьшуьшар къанундив кьадай къайдада къейд авунин ва абурун гьакъиндай гьахъ-гьисаб кьунин жигьетдай агьалийрив малуматар агакьарунин кIвалах Да­гъустандин ЦУР-дихъ галаз санал ГЖИ-дални РД-дин информациядин ва печатдин Агентстводал тапшурмишун теклифна.

Чешмеди къейдзавайвал, и мес­лят­рин тереф РД-дин Гьукуматдин Пред­седатель Абдулмуслим Абдулмус­ли­мовани хвена.

Пулдин куьмекар артухарда

2024-йисуз Дагъустанди къушчивилин майишатар субсидийралди таъминарун патал чара ийизвай пулдин такьатрин кьадар артухарда. Идакай РД-дин хуьруьн майишатдин ва недай суьрсетдин министерстводин пресс-къуллугъди хабар гана.­

Чешмеди кхьизвайвал, 2023-йисуз винидихъ  къалурнавай  макьса­дар патал къушар хуьдай майишат­риз ­чара авунвайди анжах 5 миллион манат тиртIа, 2024-йисуз и такьатрин кьадар 20 миллион манатдиз барабар жеда.

Министерстводин пресс-къуллугъ­дин делилралди, пулдин такьатар региондин бюджетдик кутунва.

ГьакIни, чешмедин малуматралди, Дагъустанда 2023-йисуз вечрен какаяр гьасилун 1,7 процентдин артух хьанва – 255 миллиондив агакьдалди. Министерстводихъ  2024-йисуз и рекъем шазандалай 100 миллиондин гзафардай ниятар ава.

Мад кьве шегьерда

Чна виликан нумрайрикай сана Махачкъалада сифте яз гьакъидихъ тир улакьар акъвазардай чкаяр кардик кутадайдакай хабар ганай. СМИ-ра къейдзавайвал, и проект республикадин мад кьве шегьерда кьилиз акъудун фикирдиз къачунва.

Кьилди къачуртIа, гьакъидихъ тир улакьар акъвазардай чкаяр, респуб­ликадин меркездилай гъейри, Кас­пийск ва Дербент шегьеррани кардик кутада. Къейдзавайвал, виликамаз кьунвай рекъемралди, Махачкъалада-3 агъзурдав агакьна, муькуь кьве шегьерда 800-дав агакьна улакьар акъвазариз жедай махсус чкаяр арадал гъида.

Пуд лагьай чкадал

2023-йисан нетижайралди, Дагъус­танда суьрсетдин кIва­тIалдин (продуктовый набор) къимет 2,1 процентдин багьа хьанва – 5 агъзурни 916 манатдал кьван, — хабар гузва «Дагъустандин экономика» телеграм-каналди.

Суьрсетдин кIватIалдин  багьавилел гьалтайла, Дагъустан СКФО-дин регионрин арада 3-чкадал ала.

Чешмеди къейдзавайвал, и жигьетдай виридалайни еке къимет Ингушетияда ава — 6 агъзурни 110 манат. Кьвед лагьай чкадал Чечня ала – 6 агъзур манат. Виридалайни тIем акакьдай къимет Кабардино-Балкарияда авайди тайин хьанва – 5,4 агъзур манатдилай са кIус тIимил яз.

РикIел хкин, шартIуналди гьисабзавайвал, вацран муддатда инсандал гьалтзавай суьрсетдин сиягьдик акатзава: саки 15 килограмм фу ва чIахар, 12,5 килограмм картуфар, 1,5 килог­рамм емишар ва гьакьван ширинлухар, саки 3 килограмм як, 1,2 килог­рамм балугъ, 18 килограмм некIедин суьрсетар.

Йисан къене – 32 процент

Махачкъалада, 2024-йисан январ­дин нетижайралди, яшайишдин кIва­лер гъиляй маса вахчузвай базарда (вторичный рынок) са кв. метрдин къимет юкьван гьисабдалди 110,9 агъзур манатдиз барабар хьанва. Вацран къене республикада са квадратдин къимет 3 процентдин хкаж хьанва. Идакай «Дагъустандин экономика» телеграм-каналди хабар гузва.

И рекъемдал гьалтайла, Махачкъалади уьлкведин 500 агъзурдалай гзаф агьалияр яшамиш жезвай шегьеррин арада кьвед лагьай чка кьазва.

Чешмеди гьакIни къейдзавайвал, меркезда са квадратдин къимет йисан­ къене 32 процентдин хкаж хьанва. Ге­къигайтIа, месела, Ставрополда и ре­къем 11 процентдиз барабар я.

Гьазурайди – Муса  Агьмедов