И йикъара, IT-пешекарар гьазурунин месэлайриз талукьарна, Махачкъалада кьиле фейи стратегиядин сессиядал РД-дин Гьукуматдин Председатель Абдулмуслим Абдулмуслимова республикада алай аямдин цIийи технологийрихъ галаз кIвалахиз чидай, чкадални гьахьтин технологияр арадал гъидай пешекарар гьазурунин игьтияж авайди къейдна.
«Чна IT-пешекарар гьазурун ва абур кIвалахдалди таъминарун патал вири жуьредин шартIар тешкилна кIанда. Ихьтин шартIара рекъемрин экономика дурумлувилелди вилик тухунин, инвестицияр желб авунин рекьерай чахъ авай мумкинвилер мадни артух жеда. Республикадин рекъемрин экономикадин хиле кар алакьдай пешекаррин дестеяр арадал гъун патал карчивилин, образованидин идарайрин ва государстводин арада амадагвилин алакъаяр мадни мягькемарна кIанзава», — лагьана премьер-министрди.
А.Абдулмуслимован гафаралди, алай вахтунда Дагъустанда IT-пешекарар 4 вуздани пешекарвилин образованидин 25 идарада гьазурзава. ЯтIани, республикада ихьтин пешекарар бес жезвач. Мисал яз, алатай йисуз гьам региондин, гьамни муниципалитетдин дережадин жуьреба-жуьре идарайра, карханайра 194 IT-пешекардин игьтияж авай.
Дагъустанда IT-пешекаррин кьитвал арадай акъудун патал РД-дин рекъемрин рекьяй вилик финин министр Юрий Гьамзатова кьилдин карханайрихъ галаз икьрарар кутIунун теклифна. Адан гафаралди, ихьтин шартIара пешекарар неинки тек са образованидин идарайра, гьакI рекъемрин экономикадин хиле кардик квай карханайрани гьазуриз жеда. Министрди къейд авурвал, ихьтин карханайриз талукь малуматар Москвадин физико-технический институтдин (МФТИ) сайтда ава.
Чи мухбир
