30-январдиз РД-дин Гьукуматдин Председатель Абдулмуслим Абдулмуслимова Урусатдин илимрин академиядин (РАН) Дагъустанда авай ахтармишунрин центрадин кьил Акай Муртазаевахъ галаз гуьруьш кьиле тухвана. Абуру центр вилик тухунин, жегьил алимриз куьмекар гунин, илимдин жуьреба-жуьре хилерай цIийи пешекарар гьазурунин ва 2024-йисуз илимдин чIехи мярекатар тешкилунин месэлаяр веревирдна.
РАН арадал гъайидалай инихъ цIи 300 йис тамам жезва. И лишанлу вакъиа Дагъустандани вини дережада аваз къейддайвал я. Акай Муртазаеван гафаралди, юбилейдин мярекатриз гиламаз гьазурвилер аквазва. Кар алайбурукай сад февралдин вацра кьиле фидай илимдин сессия я.
Алай вахтунда Дагъустандин илимрин центрада 700 касди зегьмет чIугвазва, абурукай 370 илимдин къуллугъчияр я. Абурун 25 процент жегьилар я. Центрада 8 институтди кIвалахзава. Идалайни гъейри, ина аспирантура кардик ква ва 42 аспирантди очнидаказ кIелзава.
«Лезги газет»
