21-22-февралдиз Дагъустанда­  агропромышленный «ДагАг­ро­Каспий» фо­рум 2-сеферда­ кьиле фида. Мяре­катдин теш­ки­латчияр РД-дин хуьруьн майи­шат­дин ва недай суьрсетдин ми­нис­­терство, «Да­гъустандин­ теп­­­лицаяр» ассоциация ва «Рост­ЭкспоТент» я.

Кьве йикъан вахтунда Россия­дин регионрай ва къецепатан са жерге уьлквейрай тир компанийри Каспийскда Али Алиеван тIварунихъ галай спорткомплекс­дин майдандал хуьруьн майишатдин хилен  виридалайни цIийи технологийралди гьазурнавай тадаракар майдандиз акъудда: агродронар, тракторар, тум цадай, дигидай алатар ва къурулушар, теп­лицайра ишлемишзавай затIар, гьакIни алай аямдин миянардай шейэр, тумар. Идалайни гъейри, «Алафар ва ветеринария» хилен сергьятра аваз ина малар патал гьар жуьредин комбикормаяр гьазурзавай­ кар алай карханайри иштиракда. Фо­рум-выставкадин иш­­тиракчийриз хуьруьн майишат­дин производстводин хи­­ле ишле­мишзавай алай аямдин IT-тех­но­логияр, «акьуллу фермаяр» патал тадаракар, хипехъанвилин, къушчивилин, куьнуьчивилин хилер ре­къем­ламишунин гележег авай проектар итиж­лу жеда.

Дагъустандин фермервилин майишатар активнидаказ виликди физва ва  и рекье цIийи алакъаяр туькIуьриз гьазур я. И жигьетдай, яни майишатрин, лежберрин­, фермеррин, гьакIни и хиле  зегьмет чIугвазвай алимрин арада ала­къаяр тайинарунин, сада масадан тежрибадикай менфят къачунин жигьетдай выставка лап хъсан мумкинвал яз гьисабзава.

Амина Муслимова