Дагъустандин Яшайишдин фондуни мадни хабар гузвайвал, 2024-йисуз аялрин пулар агъадихъ галай графикдин бинедаллаз хтун лазим я. Кьилди къачуртIа, алай йисуз аялрин пулар гьар вацран 3, 5 ва 8-йикъара хкведа.

Гьар вацран пудаз (мисал яз, 3-февралдиз) кIвачел залан тир дишегьлийрив ва кIвалах тийизвай диде-бубадив аялрин са йисни зур тамам жедалди гузвай пулар агакьда. Ибурулайни гъейри, и юкъуз военный рекьяй къуллугъчидин (по призыву) аялдиз ва 8 йисалай 17 йисалди яшара авай аялризни пул къведа. Эгер и югъ ял ядай ва суварин йикъал ацалтайтIа, пособие вилик квай кIвалахдин юкъуз гуда. ИкI, алай йисуз рес­публикадин агьалийрин МИР картайриз ­январдин вацран пулар 2-февралдиз къведа, гьикI хьи, 3-февраль киш йикъал ацалтзава.

Мадни. Дидевилин (хизандин) капиталдин такьатрин гьисабдай 3 йис тамам жедалди яшда авай аялриз пул гьар вацран 5-юкъуз (мисал яз, алай йисан январдин пул 5-февралдиз) къведа. КIвалахзавай диде-бубадин аялдин 1,5 йис тамам жедалди гузвай пул — 8-юкъуз (мисал яз, алай йисан январдин пул 8-февралдиз).

Эгер аялрин пулар почтадин алакъа­дин куьмекдалди, нагъд пулуналди  ага­кьарзаватIа, абур вацран 1-25-йикъара поч­та­дин отделенидин кIвалахдин график­дин бинедаллаз агакьарун ла­зим я.

Рагнеда Рамалданова