Миграгъ аламатдин чкадал ала. Ам, дугъриданни, кьуд дагъдин юкьва авай муказ ухшар ава. И хуьр алимралди, гафунин, чIалан устадралди, шаирралдини писателралди, камаллу инсанралди машгьур я. Мисал яз, заз са шумуд касдин тIварар кьаз кIанзава: филологиядин илимрин доктор Къурбан Акимов, Дагъустандин халкьдин писатель Арбен Къардаш, РД-дин халкьдин шаир Жамидин, «Лезги газетдин» литературадин отделдин редактор яз кIвалахай Мердали Жалилов, шаирар тир бубани хва Шихнесир ва Зульфикъар Къафлановар ва мсб.
Къенин зи куьруь ихтилат лагьайтIа, набататрин генетикадин рекьяй биологиядин илимрин доктор, Дагъустандин илимрин лайихлу работник, Н.И.Вавилован тIварунихъ галай ВНИИР-дин генетикадин ахтармишунардай идарадин заведующий Асеф Зилфикъарович Шихмурадовакай я.
Асеф Зилфикъарович 1964-йисан 1-январдиз Докъузпара райондин Миграгърин хуьре дидедиз хьана. Юкьван школа куьтягьай ада Советрин Армиядин жергейра къуллугъайдалай кьулухъ 1988-йисуз ДСХИ-дин агрономвилин факультетда кIелна. Гуьгъуьнлай ам Санкт-Петербург шегьерда авай Н.И.Вавилован тIварунихъ галай ВНИИР-дин аспирантурадиз гьахьна. 1997-йисуз Асефа кандидатвилин диссертация хвена. 1989-йисалай инихъ ада Дагъустандин Н.И.Вавилован тIварунихъ галай ВНИИР-дин генетикадин ахтармишунарзавай идарада кIвалахзава. Илимдин рекье инанмишвилелди виликди физвай Асеф Зилфикъаровича 2014-йисуз докторвилин диссертацияни хвена. Адан ахтармишунрин нетижайрикай неинки республикадин ва уьлкведин илимдин идарайра, гьакI къунши Азербайжандин милли академиядани менфят къачузва.
Асеф Шихмурадова, дуьньядин халкьарин конференцийра иштиракиз, Дагъустандин хуьруьн майишатдин чирвилер гузвай институтра, университетра лекцияр кIелиз, студентрин чирвилер генани деринарзава. Илимдин адан вишдав агакьна макъалаяр чапдай акъатнава.
1998-2006-йисара Асеф Шихмурадова «Юждаг» институтда муаллим яз кIвалахна, 2006-2010-йисара адакай и институтдин физкультурадин факультетдин декан хьана. Гуьгъуьнин ругуд йисуз ада Дербентда авай Ивановодин государственный институтдин филиалда доцент яз кIвалахна. 2016-йисалай М.М. Жамбулатован тIварунихъ галай Дагъустандин государственный аграрный университетда профессор я.
2021-йисуз гзаф йисара хъсан нетижаяр аваз зегьмет чIугунай адаз «Дагъустандин илимрин лайихлу къуллугъчи» лагьай тIвар гана.
КIвалахдин рекьяй юлдашрин арада Асеф Зилфикъаровичаз гьуьрмет ава. Уьмуьрдин юлдаш Алфиятахъ галаз арадал гъанвай туькIвей хизанда кьве хвани кьуд хтул ава. 2024-йисан 1-январдиз Асеф Зилфикъаровичан 60 йис тамам хьана. Чна адаз хайи югъ рикIин сидкьидай мубаракзава. Къуй адахъ агалкьунар мадни гзаф хьурай.
Абил Межидов,
филологиядин илимрин кандидат
