Президентдин сечкияр

2024-йис неинки Россия, гьакI гзаф маса уьлквеяр патални кьетIенди, гележег тайинарзавайди хьун гуьзлемишза­ва. И кар, гьелбетда, сечкийрин вахтунда кьилиз атай, къведай регьберрин ка­маллувилелай, тешкиллу, бегьерлу­ кIва­лахдилай, тухудай сиясатдилай, яшайиш­динни экономикадин хилер йи­гин­ еришралди вилик тухунилай аслу жеда.

РФ-дин ЦИК-дин председателдин заместитель Николай Булаева ТАСС-диз хабар гайивал, мартдиз кьиле фидай сечкийра президентвиле кандидатар яз 11 касди иштиракдайвал я. Абурукай пуда президентвиле кандидатар яз чпи чеб къалурнава: Владимир Путина, блогерар тир Русских Радади ва  Анатолий Баташева.

Муьжуьд кандидат сиясатдин партийрин векилар я. Абурук акатзава: Леонид Слуцкий (ЛДПР), Николай Харитонов (КПРФ), Владислав Даванков («Новые люди»), Сергей Бабурин («Российский общенародный союз»), Андрей Бог­данов («Российская партия свободы­ и справедливости»), Борис Надеждин («Гражданская инициатива»), Сергей Ма­линкович («Коммунисты России») ва Ирина Свиридова («Демократическая партия России»).

КIелзавайбуруз кандидатрикай В.Пу­тин, Л.Слуцкий, Н.Харитонов, С.Ба­бурин чизвай инсанар амайбур сиясатдин майдандал экъечIнавай цIийи инсанрик акатзава.

Владимир Путин уьлкведин Президентдин къуллугъдал кьуд сеферда хкяна. 2020-йисуз уьлкведин Конституциядик кухтур дегишвилери Владимир Путиназ мад президентвилин сечкийра иштиракдай мумкинвал гана. Ам дуьньяда машгьур политикрикай сад я.

Николай Харитонов Коммунистрин партиядин член, са шумуд сеферда Госдумадиз хкянавай депутат, сиясатдин деятель я. Хуьруьн майишатдин пешекар тир политикди фадлай Госдумада кIвалахзава. Ада президентдин 2018-йисан сечкийрани кандидат яз иштиракнай.

Леонид Слуцкий экономикадин илим­рин доктор, 2003-йисалай ЛДПР-дин патай Госдумада депутат я. Алай вахтунда ада Госдумадин къецепатан­ крарин рекьяй комитетдиз регьбервал гузва. Владимир Жириновский рагьмет­диз фейи­ла, партиядин членри ам ЛДПР-дин председателвиле хкяна.

Сергей Бабурин Россиядин политик, юрист, «Российский общенародный союз» партия тешкилай ва адаз регьбервал гузвай кас я. Ада уьлкведин сиясатдин уьмуьрда активвилелди иштиракзава. Адахъ законодательный органра кIвалахунин рекьяй еке тежриба ава.

Владислав Даванков сиясатдин майданда цIийи, амма общественный уьмуьр­да активвилелди иштиракзавай кас я.

Борис Надеждин Госдумадин виликан депутат, Долгопрудный шегьердин муниципалитетдин депутат, физикадинни математикадин илимрин кандидат, «Регионрин проектрин ва законодательстводин институт» фондунин президент я. Адан тереф Дмитрий Кисиеван «Кандидатрин штаб» объединениди ва «Гражданская инициатива» партияди хуьзва.

Андрей Богданов политтехнолог, «Правое дело», «Демократическая партия России», «Народная партия России»  партияр тешкилайбурукай сад я. Сиясатдин кIвалахдал 1990-йисалай машгъул я. 2008-йисуз ада президентдин сечкийра кандидат яз иштиракна.

Рада Русских блогер, пешекар визажист, карчи я. Адахъ косметикадин вичин хсуси ярж, волновой диагностикадин центр ава.

Ирина Свиридова, экономист Тамбовдай я. Ада казначействода, финанс­рин идарайра кIвалахна.

Анатолий Баташев блогер-эколог, «Зе­леная альтернатива» партиядин регь­бер я.

Сергей Малинковича 2003-йисалай­ Петербургдин ва Ленинграддин областдин общественный организацийриз регь­­бервал гана. 2012-йисуз ам «Коммунисты России» партиядин ЦК-дин секретарвиле хкяна. 2022-йисалай Малинкович ЦК-дин председатель я.

Президентвиле кандидатар сечкийрилай вилик квай таблигъатдин кIвалах тухунив эгечIнава. Владимир Путин цIийи йисан каникулрин вахтунда Россиядин Игитрин ва дяведин махсус серенжемда телеф хьайи кьегьалрин хизанрихъ галаз гуьруьшмиш хьана. Ахпа­ ада Красногорскда авай оборонадин ми­нистерст­водин А.Вишневскийдин тIвару­нихъ галай госпиталда сагъар­ хъийизвай аскеррал кьил чIугуна. И йи­къара В.Путин сифте сеферда яз Чукоткадиз фена, анай — Хабаровскдин крайдиз. Зегьметчи коллективрин дердийрихъ, теклифрихъ яб акална ва уьлкведин меркездивай лап яргъа авай маканар мадни вилик тухудай рекьер тайинарна.

Леонид Слуцкий Ставрополдин Крас­нодардин крайра зегьметчи коллек­тиврихъ, студентрихъ галаз гуьруьш­миш жезва. Адахъни Чукоткадиз фидай, Дальний Востокдиз талукь махсус прог­рамма туькIуьрдай фикир ава. Саратовдин областда Слуцкийди чи аскерриз махсус парталар цвазвай фабрикадин устIаррихъ галаз суьгьбетна. Сочида ада цIийи йисан мярекатда иштиракна.

Николай Харитонова сечкийрин­ ви­лик квай таблигъатдин кампания Даль­ний Востокдилай гатIунда. Ам Но­во­сибирскдин областдай я. Адан сечкийрин штабдиз КПРФ-дин ЦК-дин председатель Геннадий Зюганова регьбервал гузва. Регионра партиядин отделенийри худда кIвалахзава, сечкичийрихъ галаз гуьруьшар тешкилзава.

В.Даванкова сифте нубатда вичин хайиди тир Смоленск шегьердал кьил чIугуна. Ада вич 30 шегьердиз фида ва сечкичийрин дерди-гьал чирда лагьана хиве кьунва. Ам Белгороддиз, Челябинскдиз, Екатеринбургдиз фенва.

Къейд авун лазим я хьи, Россиядин президент хкязавай сечкийриз къецепатан уьлквейрини «гьазурвал аквазва». США-дин, Европадин хейлин уьлквейрин мидя дестеяр, чинеба кIвалах тухуз алахънава. Абурун фендигар планар кьилиз акъатдач. Уьлкведин гьар са агьалиди сечкияр лап вини дережада аваз кьиле фидайвал авуник вичин пай кутун лазим я. Къецепатан лагълагъчийриз, социальный сетра чапзавай кьван тапарриз, къундармайриз яб тагана, чи уьлкве, адан итижар хуьн гьар са ватан­эгьлидин буржи я.

Россиядин сечкийрин центральный комиссияди малумарнавайвал, 2024-йисан 15-17-мартдин йикъара уьлкведин президент хкягъуниз талукь 8 лагьай сечкияр кьиле фида. Сечкийра чи гьар са агьалиди иштиракун, активвал къалурун важиблу я.

Нариман Ибрагьимов