Россиядин Яракьлу Къуватри Донбассда кьиле тухузвай военный махсус серенжемдин иштиракчи хьайи, алай вахтунда СтIал Сулейманан ва Кьурагь районрин военный комиссариатда кьилин пешекар яз кIвалахзавай 2-группадин инвалид Бадирхан Гьамзатовахъ галаз чун райадминистрациядин кьилин общественный хатасузвал хуьнин рекьяй заместитель Абуталиб Фатулаева танишарна.
— Махсус серенжемда иштиракзавайбур вири халис кьегьалар, ватанпересар я, — лугьузва А.Фатулаева. – Абуруз, абурукай яз Бадирхан Агъабеговичазни, гьахълудаказ чи йикъарин игитар лугьуз жеда.
Секин къилихрин, гьар са гаф фагьум-фикирна акъудзавай жегьил итимди чи суалризни куьрелди жавабар гана.
— СВО-да иштиракуналди, ватандаш яз, за пак буржи кьилиз акъудна, — куьрелди лугьузва Бадирхана.
Алкьвадрин юкьван школа хъсан къиметар аваз акьалтIарай Бадирхан кьисметди Иваново шегьердиз акъудна. Инай адаз Россиядин армиядин жергейриз эвер гана. Са йисуз Карачаево-Черкесияда гьавадинни космосдин къуватрин частуна къуллугъ авурдалай гуьгъуьниз жергедин аскер Гьамзатова икьрар кутIунна, Калининград шегьерда Балтийский флотда къуллугъ авун давамарна.
Вишералди маса кьегьалривай хьиз, къене халис дагъвидин рикI авай Бадирханавайни лазим макъамда кьулухъ акъвазиз хьанач. Ам махсус серенжем гатIунай гьа сифте йикъара гуьгьуьллувилелди Донбассдиз фена.
— Сифте вахтара, дяведин гьерекатар кьиле фидайла, вердиш туширвиляй, кичI акат тавуна амукьдачир, — ихтилатзава Бадирхан Гьамзатова. – Яваш-яваш вердиш хьана, къурхулувал амукьнач. Махсус серенжемда захъ галаз дагъустанвийрини иштиракна. За ачухдиз лугьун: кар чкадал атайла, чи гадаяр халис кьегьалриз элкъвезва, абуру жуьрэтлувал къалурзава.
Б.Гьамзатова ихтилат авурвал, сифтедай ада пулемётчик яз Харьковдин областдин Балаклея шегьердин патарив женгера иштиракна. Младший сержантди гуьгъуьнлай Луганскдин областда, 10 касдикай ибарат отделенидин командир яз, Украинадин жаллатIриз ягъунар кьуна, викIегьвилер къалурна.
Дяве мусибат я: къурбандар, хасаратвилер, барбатIвилер…
2022-йисан 11-ноябрдиз Луганскдин областда кьиле фейи къати са женгина дирибаш хва Бадирханал залан хер хьана. Саки 8 вацра ам Москвада Бурденкодин тIварунихъ галай госпиталда къаткана. Духтуррин зегьметар, хер хьанвай офицерринни аскеррин патахъай къайгъударвал Бадирхан Агъабеговичан рикIелай алатдач.
Хьайи хирерикди Б.Гьамзатов са гъиликай магьрум хьана. 2-группадин инвалид ватандиз рахкурна.
СВО-дин зонада къалурай кьегьалвилерай адаз 4-дережадин «Георгийдин хаш» ва «Женгера тафаватлувиляй» медаль ганва.
Бадирхан Агъабеговича чаз лагьайвал, ватанпересвилин гьиссер адак ва амай стхайрик чпин вири уьмуьрда чилел зегьмет чIугур, гъилералди къазанмишай гьалалдин фу тIуьр, алай вахтунда, пенсияда аваз, жегьилрин арада насигьатчивилин кIвалах тухузвай дидедини бубади кутуна. Малум хьайивал, Бадирханан стха Надирни халис ватанперес я, адани 2009-2010-йисара Чечняда Россиядин Яракьлу Къуватрин жергейра къуллугъна.
Бадирхан Агъабегович военный комиссариатда кIвалахал эцигнава. Ахлакь, низам, ачух рикI авай, дагъвидиз хас къилихрин инсан тир Гьамзатовакай, адан кIвалахдикай разивилин келимаяр военный комиссар Райзудин Женетовани лагьана.
— Чи кар гьахълуди я, гьавиляй чун, Россиядин Яракьлу Къуватар, СВО-да гъалибни жеда, — лагьана Бадирхан Агъабеговича суьгьбетдин эхирдай. – Вирибурун хьиз, зи мурадни дяве фад куьтягь хьун ва адан иштиракчияр, гъалибвал къачуна, сагъ-саламатдиз чпин хизанрин патав хтун я.
Хазран Кьасумов
