Яшайишдин газификация – им вичин сергьятра аваз газдин кьилин турбадилай участокдин часпардал кьван газ тухуниз акъатай харжар государстводи эвез хъийизвай федеральный программа я.
Газдин кьилин турба тухванвай хуьрера виликдай а турбадилай вичин кIвалив кьван газ тухун участокринни кIвалерин иесийрин чпин такьатрихъ кьилиз акъудзавай. И кар себеб яз, хуьруьз газдин кьилин турба тухванватIани, такьатрин жигьетдай дарда авай бязи хизанар газдикай менфят къачуникай магьрум жезвай.
«Догазификация» программадин куьмекдалди иесийриз газдин кьилин турбадилай чилин участокдал кьван пулсуздаказ газ тухудай мумкинвал ава. И кар патал МФЦ-дин идарадиз арза вугуз жеда. Ихьтин документар герек я:
хсусиятчидин паспорт;
кIвалин ва чилин сагьиб тирди тестикьарзавай документ;
ситуационный план (чилин участокдин схема).
«Лезги газет»
