ЖикIияр ишлемишун хийирлу яз гьисабзава. Пешекаррин фикирдалди, С витаминдал гьалтайла, жикIияр лимондилай 50 сеферда къуватлу я. Адалайни гъейри, абурук А, В1, В2, В6, Р, К витаминар, минералрикай фосфор, калий, кальций, магний, натрий, ракь, цинк, цур ква. 

ЖикIияр рганвай яд мекьи хьайила, гипертония ва лекьинин азарар авайла, ишлемишзава.

ЖикIидин тарарин пешерикай авунвай мураба ва сироп секинардай такьат язни ишлемишиз жеда. Гьа са вахтунда пешекарри жикIидин тарарин дувулар рганвай яд (гьалима) кIепина къванер пайда хьуниз манийвалдай хъсан такьат тирдини тестикьарнава.

Пешекарри, духтурри гьар са набататдикай, гьа жергедай яз жикIийрикайни, менфят къачудайла, чпел алукьун эвел­ни-эвел кьилиз акъудна кIанзавай кар тирди рикIелай ракъур тавуниз эвер гузва. Вучиз лагьайтIа, гьар са затIунихъ хийирдихъ галаз санал зарар гудай такьатарни, абур ишлемишна виже текъведай дуьшуьшарни ава.

«Лезги газет»