И мукьвара Хорватиядин Загреб шегьерда кьуршахар кьунин пуд жуьредай (азаддаказ, грекринни римлуйрин жуьреда ва дишегьлийри) спортсменрин устадвал ахтармишдай турнир акьалтIна.
Алай йисуз сад лагьайди яз кьиле тухузвай и акъажунра Белоруссиядин, Саудрин Аравиядин, Молдавиядин, Туьркиядин, Ирандин, Швейцариядин, Азербайжандин, Венесуэладин, США-дин, Гуржистандин викIегь спортсменри иштиракна. Турнирда гьакIни Россиядин 5 спортсмендини чпин алакьунар къалурна, вадани кIвенкIвечи чкаяр кьуна. Шадвилелди мадни а кардикай хабар гуз кIанзава хьи, кесерлу турнирда чи ватанэгьлийри — грекринни римлуйрин жуьреда кьуршахар кьунай — Анвар Аллагьярова (60 кг-дал къведалди заланвал авайбурун арада) ва азаддаказ кьуршахар кьунай — Жабраил Гьажиева (74 кг-дал къведалди заланвал авайбурун арада) буьруьнждин медалар къазанмишна.
Гьайиф хьи, алатай йисара хьиз, цIини чи уьлкведин спортсменри бейшереф атлетрин ерида аваз иштиракна. Акъажунрин ярумчух финалдиз акъатдалди пуд бягьсина гъалибвал къазанмишай Жабраил Гьажиев Ирандай тир спортсмен Хоссейн Абузаридиз кумукьна, амма буьруьнждин медаль патал акъажунра Швейцариядай тир Тобиас Портманназ ада гьич са зеррени мумкинвал ганач.
Къейд. Ж.Гьажиев 2002-йисан 18-февралдиз Ахцегьа дидедиз хьана. Ана А.Гъаниеван тIварунихъ галай спортшколада кьуршахар кьунин сифтегьан сирер чирна. 2018-йисалай Азербайжандин хкянавай командадик кваз вичин устадвал къалурзавай чи ватанэгьлиди 21 йисал къведалди яшара авайбурун арада дуьньядин ва Европадин чемпионатра гъалибвилер къазанмишна. Ам Европадин жаванрин арада гатун Олимпиададин фестивалдин ва кесерлу хейлин маса турниррин гъалибчи я.
Турнирдин сифтегьан бягьсера Анвар Аллагьяроваз Азербайжандай тир Нихад Маммадли — 7:5, Венесуэладай тир Петравичюс Юстас 0:7 гьисабдалди кумукьна. Чи уьлкведин хкянавай командадик квай Садык Лалаевахъ галаз кьиле фейи бягьс 1:3 гьисабдалди акьалтIна. Амма А.Аллагьярова буьруьнждин медаль патал бягьсина Украинадай тир Игорь Курочкиназ гьич са баллни къазанмишдай мумкинвал ганач. Бягьс 0:9 гьисабдалди акьалтIна.
Къейд. А.Аллагьяров 2000-йисан 5-октябрдиз Ахцегьа дидедиз хьана. Москвадин областдин патай акъажунриз экъечIзавай ам Россиядин, гьакI Европадин ва 23 йисал къведалди яшда авайбурун арада дуьньядин кьве сеферда чемпион, гьакIни хейлин акъажунринни международный турниррин гъалибчи я. Алай вахтунда ада Великие Луки шегьерда физкультурадин ва спортдин госакадемияда (ВЛГАФК) кIелзава.
Рагнеда Рамалданова
