И йикъара Агъул районда авай Россиядин халкьарин адетдин медениятдин маканда Лезги театрдин коллективди чкадин халкьдихъ ва райондин медениятдин къуллугъчийрихъ галаз гуьруьш кьиле тухвана.
Мугьманар медениятдин макандин директор Камал Гьажимегьамедова тебрикна. Мярекатдал рахай Лезги театрдин директор Динара Эминовади, кьилин режиссер Мирзабег Мирзабегова, Дербент шегьердин медениятдин отделдин кьилин пешекар Гуьлпери Мирзабалаевади къейд авурвал, «Яратмишунрин десантар» миллетрин арада авай садвални дуствал мягькемарунин, ахлакьдин жигьетдай акьалтзавай несил вилик тухунин, абур чешнелудаказ тербияламишунин карда сада-садаз таъсир авунин макьсаддалди кьиле тухузва.
Къейд ийин, яратмишзавайбурун гуьруьш «Лезги театрдин театральный сезон агалун» лишандик квай сувариз элкъвена.
Театрдин актерри театрально-музыкальный итижлу программа гьазурнавай.
«Лезги газет»
