Докъузпара райондин Къурушрин хуьруьн мулкара туристрин лагерь эцигуниз талукь проектар туькlуьрунин кlвалах гатlуннава. И гьакъиндай «Лезги газетдиз» райондин администрациядин пресс-къуллугъди хабар гузва.
И йикъара «Докъузпара район» МР-дин кьил Абдурагьим Алискеров райондин капитальный эцигунрин отделдин къуллугъчийрихъ галаз санал, лагерь эцигун патал чара авунвай чилин участокдиз килигунин макьсаддалди Къурушрин хуьруьз фена.
А.Алискерован гафарай, «Ярудагъ» фестиваль, Эренлар зиярат себеб яз Докъузпара район гзаф инсанрин арада машгьур хьанва. Туристар патал лагерь эцигун районда туризм мадни вилик тухунихъ, туристриз къулай шартlар тешкилунихъ галаз алакъалу я.
Докъузпара райондин ОКС-дин кьилин архитектор Багьадин Сулейманован фикирдалди, лагерь эцигун патал тайинарнавай чилин участок алай чка кутугайди хьанва.
«Лезги газет»
